Бөхийн төрлүүдийн “U-23”-ын Азийн аварга шалгаруулах тэмцээн “Буянт-Ухаа” спортын ордонд хоёр дахь өдрөө үргэлжилж байна.
Анхдугаар тэмцээний хоёр дахь өдөр сонгомол бөхийн 55, 63, 87, чөлөөт бөхийн эрэгтэйчүүдийн 61, 92 кг, эмэгтэйчүүдийн 55, 59, 72 кг-ын барилдаан болж өндөрлөлөө. Сонгомол бөхийн 55 кг-ын жинд “Алдар” спорт хорооны тамирчин М.Даваабанди хүрэл медалийн эзэн болсон юм. Монголын сонгомол бөхийн тамирчид Азийн аваргад нэг мөнгө, нэжгээд хүрэл медаль хүртсэн амжилттай өндөрлөлөө.
Бөхийн орон Ираны сонгомол бөхийн тамирчид 10 жингээс дөрвөн алт, гурван мөнгө, хоёр хүрэл медальтай (ганцхан 97 кг-д медаль хүртээгүй) 202 оноогоор багийн дүнгээр тэргүүлэв. Харин Кыргызстан (4 алт+2 мөнгө+2 хүрэл) 182, Казахстан (2+2+3) 167 оноогоор удаалж мөнгө, хүрэл цомын эзэн боллоо.
Чөлөөт бөхийн эрэгтэйчүүдийн
92 кг-ын жинд Орхон “Ирээдүйн одод” сургуулийн тамирчин М.Цогтгэрэл,
Эмэгтэйчүүдийн 55 кг-д “Женко” клубийн тамирчин Б.Болортуяа,
59 кг-д “Женко” клубийн тамирчин П.Отгонбаяр,
72 кг-д Дорноговь аймгийн Замын-Үүд сумын “Говийн бөх” клубийн тамирчин Д.Цогзолмаа нар хүрэл медаль хүртлээ. Насанд хүрэгчдийн Э.Бэхбаяр, Т.Түвшинтулга, З.Занабазар, Ц.Чинзориг гээд Монголын хөнгөн жингийн шилдгүүдтэй олон ч тэмцээнд таарч барилдсан, Азийн АШТ-ий хошой хүрэл медальт Кыргызстаны У.Жолдошбеков таван барилдаан хийхдээ дөрөвт нь өрсөлдөгчөө цэвэр ялж түрүүлсэн. Тэрбээр 2013 онд манай улсад болсон өсвөр үеийн Азийн АШТ-д хүрэл медаль хүртсэн бол дараа жил нь залуучуудад аваргалж байв. Тэгвэл Улаанбаатарын дэвжээ түүнд тун ээлтэй байдаг гэдгээ дахин нотолж, 23 хүртэлх насны Азийн аварга боллоо.
Тэмцээний гурав дахь өдөр чөлөөт бөхийн эрэгтэйчүүдийн 57, 65, 74, 125 кг, эмэгтэйчүүдийн 50, 57, 65, 68 кг-ын жингийн тойргийн болон шигшээ барилдаан болно.
ХОЁР ДАХЬ ӨДРИЙН ДҮН:
СОНГОМОЛ БӨХ 55 кг
1. Сардарбек Конушбаев (Кыргызстан)
2. Поя Соулат Дадмарз (Иран)
3. МӨНХ-ЭРДЭНИЙН ДАВААБАНДИ (МОНГОЛ)
63 кг 1. Мейсам Карамали Далхани (Иран)
2. Элмар Талантбек Уулу (Кыргызстан)
3. Вижай Вижай (Энэтхэг)
87 кг 1. Мохаммадхади Абдоллах Сарави (Иран)
2. Калидин Асыкеев (Кыргызстан)
3. Мейрбек Кордабай (Казахстан)
ЧӨЛӨӨТ БӨХ
Эрэгтэйчүүдийн 61 кг 1. Улукбек Жолдошбеков (Кыргызстан)
2. Сонба Гонгане (Энэтхэг)
3. Мохаммад Сиаваш Намжоу (Иран)
92 кг 1. Арашк Мохаммадказем Мохеби (Иран)
2. Азат Гажиев (Туркменистан)
3. МӨНХБААТАРЫН ЦОГТГЭРЭЛ (МОНГОЛ)
Эмэгтэйчүүдийн 55 кг
1. Марина Седнева (Казахстан)
2. Анжу Анжу (Энэтхэг)
3. БАТ-ОЧИРЫН БОЛОРТУЯА (МОНГОЛ)
59 кг 1. Кумари Манжу (Энэтхэг)
2. Мадина Бакбергенова (Казахстан)
3. ПҮРЭВИЙН ОТГОНБАЯР (МОНГОЛ)
72 кг 1. Найна Найна (Энэтхэг)
2. Александра Зайцева (Казахстан)
3. ДОРЖСҮРЭНГИЙН ЦОГЗОЛМАА (МОНГОЛ)
Гэрэл зургийг Т.Болор-Эрдэнэ, Б.Уранзаяа