Монголын хүндийн өргөлтийн холбооны дасгалжуулагч багш Ц.Хосбаяр хүндийн өргөлтийн тамирчдад тарьсан тарианаас болж тамирчдын бие муудсан гэх мэдээлэл хэвлэлээр цацагдаад байна. Тодруулбал, тус холбоонд 2014-2018 он хүртэл харьяалагдаж байсан тамирчин З-д дасгалжуулагч Ц.Хосбаяр  нь юу нь үл мэдэгдэх тариаг удаа дараа тарьж байжээ. Гэтэл хэсэг хугацааны дараа тамирчин эмэгтэйн бие муудаж, эмнэлэгт үзүүлтэл “Гавлын яс чулуужсан” гэх онош тогтоогдож. Улмаар өөрт нь тарьдаг байсан цэнхэр хайрцагтай тариаг судалтал оксандралоне, энантат, пропинат гэх тариаг өөрт нь тарьдаг байсан байна.

Уг тариа нь эр гармон хүчтэй ялгаруулж, хоолой бүдүүрч, сарын тэмдэг олон сараар зогсохоос гадна үргүй болох эрсдэл үүсгэдэг үйлчлэлтэй аж. Тамирчин З-гийн биеийн байдал эрс муудаж, хагалгаанд орж сүүлдээ дотор эрхтэнд нөлөөлөн олон төрлийн мэс ажилбар эмчилгээ хийлгэжээ. Хохирогчийн ээж Хүндийг өргөлтийн холбооны нарийн бичиг Ц.Хасбаатарт хэлэхэд үл ойшоон загнаж зандарсан байна. Тамирчин З-гээс гадна тамирчин О нь мөн л дээрх тариаг тариулаад жил шахам болсон гэжээ. Түүнийг Азийн хүндийг өргөлтийн наадамд оролцох үеэр өөрийнх өмнөөс Х гэдэг охиноор допингийн шинжилгээ өгүүлсэн байна. Гэтэл шинжилгээ өгсөн тамирчин охиноос нистерлон гэх эм илэрсэн тул тамирчин О-гийн эрхийг дөрвөн жилээр хассан аж. Энэ тухай зөвхөн “Тамирчин О-гоос допинг илэрлээ” гэх гарчигтэй мэдээлэл тархаад л өнгөрсөн. Улсаас 13 алт, нэг мөнгөн медаль авч байсан чадварлаг тамирчин бусдын буруугаас болж хохирсон атал Хүндийг өргөлтийн холбооны нарийн бичиг Ц.Хасбаатар аашилж заналхийлсэн гэх мэдээлэл бас цацагдсан юм.

Уг асуудалтай холбогдуулан дасгалжуулагч багш Ц.Хосбаяртай утсаар холбогдож дараах тодруулгыг авлаа.

-Тантай холбоотой мэдээлэл хэвлэлээр цацагдсан. Үүнтэй холбогдуулан та тайлбар хийх боломжтой юу?

-Тэр хүмүүсийг би шүүхэд өгчихсөн. Шүүхээс хэвлэлд мэдээлэл өгч болохгүй гэсэн.

-Таныг тамирчдад хориотой эм өгч,  тариа тарьдаг байсан. Үүнээс болж тамирчны бие муудсан гэсэн. Та үнэхээр тариа тарьдаг байсан юм уу?

-Тийм зүйл огт байхгүй. Намайг гүтгэж байна.

-Хэнд, ямар ашигтай гэж таныг гүтгэж байгаа юм бол оо?

-Дасгалжуулагчийн суудлын төлөө ийм зүйл хийж байхгүй юу. Хаварын синдром нь хөдөлчихсөн юм байгаа биз. Нөгөөтэйгүүр, миний ааш зан таалагдахгүй болохоор тэгж байгаа юм байлгүй дээ.

-Таны эсрэг ийм дайралт хэдэн удаа ирсэн бэ?

-2-3 хүн нийлж, 10-аад удаа ингэж гүтгэж байна.

-Та ажлаасаа гарах өргөдлөө өгсөн гэсэн. Өргөдөлдөө та буруугаа хүлээсэн утгатай зүйл бичсэн байна лээ?

-Би тариа тарьсан гэж буруугаа хүлээсэн юм биш. Энэ бол цэвэр ажил үүрэгтэй холбоотой асуудал. Энд тэндээс хүмүүс шахаж хавчаад байхаар ажил хийх нөхцөл алга. Хүсээд байвал дасгалжуулагчийн ажлаа аваг. Хийж чаддаг юм бол хийнэ л биз. Надад зууралдах сонирхол алга.

-Та өргөдлөө хэзээ өгсөн юм бэ?

-Өчигдөр өгсөн.

-Өнөөдөр ажил дээр байна уу?

-Яг одоо бэлтгэлтэй байна. Үүнээс тодорхой зүйл хэлэх боломж алга. Бэлтгэл хийгээд завгүй байна.

Г.Нацаг