Польш Улсын Торун хотноо болсон Хөнгөн атлетикийн мастерын ДАШТ-ээс манай улсын тамирчин, 85 настай Ц.Раднаа 400 метр, саадтай 60 метрийн гурвын харайлтын төрөлд гурван алтан медаль, нэг мөнгөн медаль авч дэлхийн гурван удаагийн аварга болсон билээ. Дэлхийн аваргын рекордыг эвдсэн Ц.Раднаа энэ сарын 2-нд эх орондоо ирсэн бөгөөд энэ үеэр Кёкүшюзан Батбаяр угтаж авсан юм. Дэлхийн тавцнаа эх орныхоо төрийн дуулалыг эгшиглүүлсэн Ц.Раднааг “Кёкүшюзан Батбаяр гурван өрөө байраар шагнана” гэсэн мэдээлэл өчигдөр цацагдсан юм. Тэгвэл Кёкүшюзан Батбаяр өнөөдөр Ц.Раднаад гурав биш харин хоёр өрөө байр бэлэглэх арга хэмжээ Сакура бүрэн дунд сургуулийн байранд боллоо.

Ц.Раднаагийн гэр бүл байраар шагнуулах гэж байгаагаа өнөөдөр өглөө мэдсэн байна. Энэ талаар түүний хүү Р.Баттөрөөс тодруулахад “Ийм мэдээлэл өчигдөр өглөөнөөс эхэлж сошиалаар цацагдсан. Гэхдээ бид итгээгүй. Учир нь Батбаяр энэ талаар бидэнд огт хэлээгүй байсан. Гэтэл өнөөдөр өглөө байраар шагнах гэж байгаагаа хэлээд сургууль дээр ирээрэй гэж хэлсэн. Бид маш их баяртай байна” гэсэн юм.  

Дэлхийн аваргаас гурван алтан медаль хүртсэн Ц.Раднаа энэ үеэр "Бидэнтэй хамт тэмцээнд оролцсон Цэрэндолгор 80 насны ангилалд мөн төрийн дуулалаа эгшиглүүлсэн. Маш их баяртай байна. Тамирчидаа дэмжсэн ад түмэндээ маш их баярлаж байна. Биеийн тамир спортын газраас шагналд тодорхойлсон гэсэн. Тэмцээнд явахад Ахмадын зөвлөлөөс дэмжлэг үзүүлсэн. Би бэлтгэлээ Туул голын хөвөө, Зайсан толгойн шатаар өгсөж гүйх байдлаар өдөрт хоёр удаа бэлтгэл хийдэг. Хоолны дэглэм барьдаг. Өөх тостой хоол идэхгүй. Аль болох хөнгөн хоол иддэг. Энэ спортоор 30 гаруй жил хичээллэж байна. Мэргэжлийн багш хүн” гэлээ.