Самбо, Жүдо бөхийн Монгол улсын шигшээ багийн анхны гишүүдийн нэг, "Мюнхен-1972" зуны олимпийн наадмын жүдо бөхийн төрөлд эх орноо төлөөлөн оролцсон, Самбо бөхийн дэлхийн аваргын хүрэл медальт, Монгол улсын Ардын багш, Монгол улсын гавьяат дасгалжуулагч Ч.Өвгөнхүү багш өвчний улмаас таалал төгсөж бидэнд хүнд гарз тохиолоо.

Чойдорын Өвгөнхүү нь 1941 онд Сүхбаатар аймгийн Уулбаян сумын нутаг Мааньт хэмээх газар төржээ. 1961 онд ардын цэргийн албанд татагдан буудлагын 7-р батальон, барилгын 2-р батальонд жагсаалын дарга, хугацааны ахлагчаар алба хааж байгаад 1965 оноос Монголын спортын үе үеийн алдартнуудыг өлгийдөн гаргасан зэвсэгт хүчний "Алдар" нийгэмлэгээр овоглох болсон юм. Тэрээр 1968 оноос эхлэн Самбо, Жүдо бөхөөр хичээллэж 1972 онд "Мюнхен-1972" зуны олимпийн наадамд Жүдо бөхийн 80кг жинд эх орноо төлөөлөн барилдсан бол 1973 онд Ираны Тегеран хотод зохиогдсон Самбо бөхийн дэлхийн аварга шалгаруулах тэмцээнд 82кг жинд хүрэл медаль хүртэж байжээ. Мөн 1973 оноос эхлэн "Алдар" нийгэмлэгт дасгалжуулагчаар томилогдсноос хойш Самбо, Жүдо, Үндэсний бөхийн спортын төрөлд эх орныхоо нэрийг тив, дэлхийд нэр алдараа дуурсгасан шилдэг тамирчдыг бэлтгэх үйлсэд өөрийн хувь нэмэр, хичээл зүтгэлээ харамгүй зориулж, олон шилдэг тамирчин бэлтгэн гаргасан юм. Түүний гаргасан амжилтыг төр засаг харгалзан үзэж 1992 онд Монгол улсын гавьяат дасгалжуулагч, 2017 онд Ардын багш цолоор тус тус шагнуулжээ.

МОНГОЛЫН САМБО БӨХИЙН ХОЛБОО