Японы нийслэл Токио хотод пауэрлифтингийн хэвтээ шахалтын ДАШТ болж байгаа. Тэмцээн эхлээд дөнгөж гурав хоноход Монголын баг тамирчид таван медаль хүртээд байна.

Тухайлбал тэмцээний эхний өдөр эрэгтэйчүүдийн ахмадын ангилалын 105 кг-ын жинд Ц.Мөнхбаяр мөнгөн медаль хүртсэн бол араас нь залуучуудын 74 кг-д Э.Галбаяр хүрэл, насанд хүрэгчдийн 105 кг-д "Рио-2016" паралимпийн наадмын хүрэл, Дэлхийн цом, Азийн аварга шалгаруулах тэмцээн, Азийн наадмын алтан медальт, дэлхийн дээд амжилт эзэмшигч, гавьяат тамирчин Э.Содномпилжээ 247 кг-ыг шахаж мөнгөн медаль хүртсэн юм.

Энэ амжилт түүний ДАШТ-ээс хүртсэн гурав дахь медаль бөгөөд өмнө нь нэг алт, нэг мөнгөн медаль хүртэж байлаа. Тэгвэл өнөөдөр мастер-1 ангиллын 66 кг-д М.Гансүх мөнгө, 83 кг-д Г.Мөнхчулуун хүрэл медаль хүртэж, Монголын багийн тав дахь медалийг авчирлаа. Тус тэмцээн энэ сарын 25-нд өндөрлөх бөгөөд үлдэж буй өдрүүдэд Медалийн тоо нэмэгдэх боломжтой гэж албаны хүн хэлж байна. Тэмцээнд баг тамирчдыг Монголын пауэрлифтингийн нэгдсэн холбооны ерөнхий нарийн бичгийн дарга Дашийн Баттулга удирдан оролцож байгаа юм.

Б.Жаргал