Монгол Улсын Ерөнхий сайд У.Хүрэлсүхийн ивээл дор сагсан бөмбөгийн 3х3 төрлийн U-18 ДАШТ Сүхбаатарын талбайд хоёр дахь өдрөө үргэлжилж, Монголын хөвгүүд хоёр дахь ялалтаа авлаа. Тэд энэ өдрийн жинхэнэ баатрууд байлаа. Манай хөвгүүд эхний учраа болох Латвийн хүчирхэг багийг 20:15-аар хожсоноор Сүхбаатарын талбайд хурсан олны баяр бахдлыг дээд цэгт нь хүргэсэн.

Манай сагсан бөмбөгийн хорхойтнууд багийнхаа үүн шиг ялалтыг хараагүй удсан болоод тэр үү уухайлан дэмжих нь хөвгүүдэд улам хүч өгнө билээ. Энэ дуулиан намжиж амжаагүй байтал хоёр дахь тоглолтондоо Беларсын багийг 21:15-аар бут ниргэж орхисон. Хөгжөөн дэмжигчдийн баяр хөөр ямар байсныг энд нурших нь илүүц биз. Ингэснээр манай залуус хэсгээ тэргүүлж байгаа юм.

Монголын багт Азийн АШТ-ий хүрэл медальтай. Багийн бүрэлдэхүүнд Гавьяат тамирчин Ц.Шаравжамцын хүү, дээд лигийн хүрэл медальтай, өсвөр үеийн УАШТ-ий найман алтан медальтай, шилдэг тоглогчоор долоон удаа шалгарсан Энхийн-Од, Дархан аварга Г.Өсөхбаярын хүү, 21 аймгийн үндэсний лигийн аварга, өсвөр үеийн УАШТ-ий алт, мөнгө, хүрэл медальтай, шилдэг тоглогчоор нэг удаа шалгарсан Пэрэнлэйжамц, өсвөр үеийн УАШТ-ий мөнгө, хүрэл медальт, шилдэг холбогчоор шалгарсан Л.Авирмэд, өсвөр үеийн УАШТ-ий хоёр алт, нэг мөнгө, хоёр хүрэл медальтай, шилдэг тоглогчоор хоёр удаа шалгарсан А.Батхуяг нар багтжээ. Энэ өдрийн тоглолтын гол баатарыг нэрлэ гэвэл Ш.Энхийн-Од гэдэгтээ маргах хүн гарахгүй байлгүй. Тэрбээр хамгаалт, хаалтыг тун чамбай хийгээд зогсохгүй тоглолт бүртээ 11 оноо авсан үзүүлэлттэй байна.

Б.Жаргал