Канад Улсын жүдо бөхийн шигшээ багийн тамирчин, ДАШТ-ий алт, хүрэл медальт, Пан америкийн хошой аварга, залуучуудын ДАШТ-ий мөнгө, хүрэл медальт, Парисын их дуулга тэмцээний хошой алт, Хөх хот, Чэжү гранпри тэмцээний алтан медальт Криста Дегучитэй хавар ирэхэд нь ярилцсанаа хүргэж байна.
-Сайн байна уу. Монгол-Канадын жүдо бөхийн тамирчид хамт бэлтгэл хийж байгааг дуулаад таныг зорьж ирлээ. Бэлтгэлийн талаар юу хэлмээр байна?
-Төсөөлж байснаас илүү үр дүнтэй боллоо. Талын Монголд анх удаа ирж байгаа маань энэ. Би байгальд их дуртай. Энд агаар нь сайхан юм. Зэрлэг ан амьтан үзээд сэтгэл их хөдөллөө. Хамт бэлтгэл хийсэн бөхчүүдийн тухайд гэвэл, Монголын жүдочид биеийн хүчээр онцгой сайн. Тэмцээн уралдааны үеэр ч илүү нь ажиглагддаг. Тиймээс монгол бөхчүүдтэй бэлтгэл хийж байгаагаа том завшаан гэж үзэж байна.
-Ирэхээсээ өмнө Монголын талаар хэрхэн төсөөлж байв?
-Үнэнээ л хэлье. Би Монголыг хөдөө тал нутгаар төсөөлж байлаа. Тэгсэн Улаанбаатарт ирээд байдал өөр байгааг олж харлаа. Жүдогийн заал гэхэд өмнө нь хаана ч ийм олон хүн нэг дор бэлтгэл хийж байхыг харж байсангүй.
-Таныг жүдогийн дэвжээнд эрт хөл тавьсан гэж сонссон. Яагаад заавал жүдог сонгох болов оо?
-Би гурван настайгаасаа барилдаж эхэлсэн. Манай ээжийн найз нь жүдо бөхийн дасгалжуулагч байсан нь миний хувьд завшаатай хэрэг болсон. Аав канад, ээж япон хүн л дээ. Тэр үед японд эрлийз хүн цөөхөн байсан болохоор аав маань намайг биеэ хамгаалах эрдэмд суралцуулахаар миний анхны дасгалжуулагчид хөтөлж шавь оруулсан гэдэг.
-Харин та дуртай байсан уу?
-Жаахан байсан болохоор өөрт яг ямар мэдрэмж төрснийг санахгүй байна. Тэгээд жүдогоор долоон жил хэртээ хичээллэж, барилдааны наадах цаадахыг гадарлаад ирэх үедээ жаахан уйдсан болохоос бусдаар бол гайгүй ээ.
-Спортоор эрт хичээллэхийн давуу тал гэвэл?
-Би хар нялхдаа жүдогийн анхан шатны зүйлст суралцсан болохоор цаг хожсон гэж боддог. Намайг арван настайд зарим хүүхэд жүдогийн "А" үсэг заалгаж байхад би мэх сурч байлаа.
-Таныг Канадын шигшээ багаас эхэлж дуудахад нь яагаад татгалзсан юм бэ?
-Тухайн үед 17 настай залуучуудын ангилалд барилдаж байх үед Канадаас шигшээ багийнхаа нэрийн өмнөөс тэмцээн уралдаанд оролцуулая гэхэд нь татгалзсан. Тэгээд гурав, дөрвөн жилийн дараа дахин санал тавихад нь зөвшөөрсөн.
-Канадад тань шиг ур чадвартай тамирчны бэлтгэлийг өндөр түвшинд хангах хүн үгүйлэгддэг үү?
-Тэнд олон мундаг хүн бий.
-Гэхдээ японыг яаж гүйцэх билээ?
-Тэр ч тийм. Гэхдээ сүүлийн жилүүдэд Канадын шигшээ багийн тамирчдынх нь түвшин ахиж байгаа.
-Канадын эмэгтэй жүдочдоос хамгийн өндөр амжилт үзүүлсэн нь та. Танд удахгүй болох ДАШТ-ээс алтан медалийн итгэл хүлээлгэж байна уу?
-Манайхны надаас хүсэн хүлээсэн хүлээлт нь заримдаа дарамт болдог. Хүмүүсийн итгэл найдварыг алдах хэцүү шүү дээ. Гэсэн ч сэтгэл зүрхээ амжилтын төлөө зориулж байгаа. Японы жүдочид надтай адил нутагтаа болох тэмцээнд түрүүлэхийг эрмэлзэж, сэтгэл санаагаа багагүй чилээж байгаа болов уу. Аль ч орны тамирчны зовлон ийм байдаг хойно. Сэтгэл зүйн элдэв дарамтад өртөхгүйг хичээж, ирэх жил болох олимпийн наадамд нэг сайхан үзье гэж бодож байна.
-Та ДАШТ-ээс хүрэл медаль хүртдэг жилээ Японы бөхтэй учраа таарсан. Таны сэтгэл санаа тэр үед ямар байв?
-Хэцүү гээд яах билээ. Сайн тамирчинаас зугтана гэж бэлтгэл хийдэггүй байлтай. Сайнтай нь таарна гэж тооцоолж бэлтгэлээ хийх ёстой байх аа. Хагас шигшээд японы бөхөд ялагдаж, зорилгодоо хүрээгүй нь нэг тийм юм болсон. Тэр ялагдал хэдий харамсалтай ч "бэлтгэл сургуулилтаа илүү сайн хийгээрэй" гэсэн ташуур болсон. Би тэр хүрэл медалийн тавцангаас түрүүлэх найдвар ойрхон байгааг олж харсан юм.
-Токиогийн ДАШТ (ДАШТ-ий өмнө авсан ярилцлага) хаяанд ирлээ. Таны бэлтгэл сургуулилт хэр хангагдаж байна вэ?
-Дэлхийн аваргаас медаль авна гэдэгтээ эргэлзэхгүй байгаа. Гол нь олимпод оролцох эрхийн оноогоо цуглуулах нь чухал байна.
-Токиогийн олимпийн татамид таны өмнө монгол жүдоч зогсож байна гэж төсөөлье. Та хэнийг байгаасай гэж хүсэх вэ?
-Сумъяаг.
-Яагаад?
-Би Сумъяад өмнө нь ялагдаж байсан болохоор даагаа нэхэх бодолтой байгаа.
-Та монголд ирээд Сумъяатай бэлтгэл хийсэн үү?
-Үгүй ээ. Тэр ирээгүй.
Б.Жаргал
