Монголын Жүдо бөхийн холбооны удирдлагууд нийтээрээ огцорлоо. Тодруулбал, Төрийн тэргүүн Х.Баттулга Ерөнхийлөгчөөр нь ажилладаг тус холбооны гүйцэтгэх захирал М.Бөхбат, ерөнхий дасгалжуулагч О.Балжинням тэргүүтэй дасгалжуулагчид үүрэгт ажлаасаа огцрорч буйгаа мэдэгджээ. Учир нь, Монголын жүдо бөхийн шигшээ багийн тайлан хурал өчигдөр болж энэ үеэр дээрх шийдвэрийг гаргасан байна. Монголын шигшээ багийн удирдлага болон дасгалжуулагчдын шийдвэр “Токио-2019” ДАШТ-д хүссэн амжилтаа гаргаагүйтэй холбоотой холбоотой гэнэ.
Олимпийн өмнөх уг тэмцээнд Монголын шигшээ баг нэг хүрэл медаль, тавдугаар байр, долдугаар байрт орсон амжилттай ирсэн юм. Энэ үеэр Жүдо бөхийн холбооны гүйцэтгэх захирал М.Бөхбат “Тамирчдаа бэлтгэл сургуулилтад хангалттай хамруулж чадаагүй, уураг витаминжуулалтаар хангалттай хангаж чадаагүй, бэлтгэл тактикийн барилдаанууд дээр алдаа дутагдалтай, чамлахаар байсан. Клубын багш дасгалжуулагчид бусад тамирчдыг энэ хүрээнд сайн хамруулж чадаагүй, бэлтгэл хангагчдыг хангалттай зохион байгуулж чадаагүй гээд эдгээр үндэслэлээр МЖБХ-ны удирдлага миний бие өөрийн хүсэлтээр огцрох шийдвэрийг гаргалаа” гэжээ.
Харин О.Балжинням “Найман жилийн хугацаанд энэ багаа ахлаж ажилласан байна. Энэ хугацаанд бидний гаргасан амжилт ч өндөр. Дэлхийн аварга гурав, ДАШТ-ий мөнгөн медаль гурав, хүрэл медалийг 10 гаруй тамирчин авсан байна. Олимпоос 2 мөнгө, 1 хүрэл, Азийн наадмаас 3 алтан медаль авсан. Гэвч 2019 оны Токиогийн ДАШТ-д, олимпийн урд жил болж байгаа тэмцээнд бид нарын ажлын алдаа дутагдлаас болж нэг хүрэл медаль, нэг тав, нэг долдугаар байр гэсэн амжилт үзүүлсэн. Бүх дасгалжуулагч үүндээ дүгнэлт хийгээд дараагийн хүмүүс нь шигшээ багаа авч олимпид орог гэсэн үүднээс бүгд ажлаа өгч байгаа юм” гэсэн байна.
С.Сүлд
Сэтгэгдэл (7)