Олон улсын пауэрлифтингийн холбооны насанд хүрэгчдийн ДАШТ-ээс алтан медаль хүртсэн ОУХМ Д.Түмэнжаргалтай ярилцлаа.

-Олон улсын тавцанд эх орныхоо нэрийг өндөрт мандуулж, тамирчин бүрт тохиогоод байдаггүй дэлхийн аварга хэмээх эрхэм алдрын эзэн болсонд баяр хүргэе?

-За, баярлалаа.

-Монголын пауэрлифтингийн спортын түүхэнд таван медальтай анхны тамирчин боллоо шүү дээ?

-Харин тэглээ. АНЭУ-ын Дубай хотод пауэрлифтингийн гурван төрөлтийн 49 дэх удаагийн ДАШТ-ий хэвтээ шахалтын төрөлд 315 кг-ыг шахсанаар алтан медаль хүртлээ. Нийлбэр дүнгээр бол наймдугаар байрт шалгарсан.

-Та бэртэл гэмтэлээ эдгээж амжилгүй явсан. Энэ утгаараа таныг медаль авна гэж яг үнэндээ бодсонгүй?

-Миний санааг зовоосон ганц зүйл нь нурууны гэмтэл байлаа. Мөн цаг агаарын зөрүү нь хүний биед мэдэгдэхүйц өөрчлөлт үзүүлдэг юм байна. Энэ хүнд хэцүү бүхнийг даван туулахад баг хамт олны халуун дулаан уур амьсгал, эв нэгдэл нөлөөлсөн. Өнгөрсөн 2017 онд Өмнөд Амфрикт болсон ДАШТ өвлийн улиралтай таарсан. Энэ үед ч гэсэн бэрхшээл багагүй тулгарсан. Ингэж хэцүү сорилтыг өмнө нь туулсан нь бас нөлөөлсөн байж мэднэ.

-Та бол дэлхийд хүлээн зөвшөөрөгдсөн тамирчин. Энэ тэмцээнд тантай илүү хүчтэй өрсөлдөх тамирчин хэн байв?

-Украины тамирчин “World Game”-ын хошой аварга Бели Сергей, өнгөрсөн жилийн Дэлхийн аварга Александр Рубертс гээд хоёр том аварга байсан. Нэг нь шахалтын төрөлд, нөгөө нь суултын төрөлд амжилт тааруу оролцсон. Энэ хоёр агуу аваргын урд гарна гэж бодсонгүй. Хэрэв бэртэл гэмтэл гайгүй байсан бол нийлбэрээр медаль хүртэх боломж байсан. Энэ алтан медаль миний хувьд их үнэ цэнэтэй. Үнэнээ л хэлье. Би энэ тэмцээнээс медаль горьдож оролцоогүй. Аз түшлээ, нутгийн уул ус харлаа.

-ДАШТ-ий бэлтгэлээ зунаас эхлүүлсэн нь медаль хүртэхэд дөхөм болсон байх?

-Зун хэвтээ шахалтын УАШТ-ээс ДАШТ-д оролцох эрхээ авсан. Тэр мөчөөс тэмцээнд орно гээд бэлтгэж эхэлсэн л дээ. Гэтэл есдүгээр сард нуруугаа бэртээж өнжих бодолтой байсан ч гүрийсээр байгаад мурий нуруутай тэмцээнд орсон. Гэр бүлийн хүн маань амаржих гээд өнөө маргаашгүй байгаа ч намайг онгоцны буудалд тоссон нь сайхан байна. Энэ ташрамд надад үргэлж тусалж дэмждэг гэр бүл, аав, ээж, Төв аймгийн Бүрэн сумын нутгийн зон олон, холбооныхоо нийт удирдлагууд, “Мустанг” клуб, дасгалжуулагчид, П.Хангал ахдаа баярлалаа.

-Та пауэрлифтингт орохоос өмнө бодибилдинг, фитнессээр хичээллэж байсан байх аа. Ямар амжилт үзүүлж байв?

-2010 онд пауэрлифтингийн спортоор хичээллэж эхэлсэн жилээ залуучуудын Азийн аварга шалгаруулах тэмцээнд оролцож байлаа. Бодибилднгийн спортоор бол 2005-2009 онд хичээллэж, 2008 онд Монголд болсон Зүүн Азийн аварга шалгаруулах тэмцээний залуучуудын ангилалд түрүүлсэн. Пауэрлифтингийн суурь нь бодибилдинг гэж ярьдаг. Дасгалжуулагч маань пауэрлифтингийн спорт чамд илүү зохино гэхээр энэ спортыг сонгосон юм.

Б.Жаргал