Монголчууд сайхан наадлаа. Наадлаа ч гэж амрав. Хаа нэгтээ, гэр бүлээрээ амарч, зугаалж явсан, яваа хүн бүрийн зураг хөрөг сошиал орчинд цаг, минут тутамд хөвөрсөн нь үүний илрэл. Коронавирус хэмээх аймшигт цар тахлын хүрээнд амны хаалт зүүхээс эхлээд хоёроос дээш хүнтэй бөөгнөрч уулзахгүй байх хориглолтоос “залхсан” монголчууд хөдөө талыг зорьж, тэндээ гэр бүлээрээ амар тайван цаг үеийг өнгөрөөх нь байж болох л үзэгдэл.

Гэвч амралт, аялал зугаалгын цаг мөч цөөхөн монголчуудыг тийм ч таатай “угтсангүй”.

Байгалийн давагдашгүй хүчин зүйл хэмээх урьдчилан тооцоолоогүй аюул, бас хэн нэгний хэнэггүй, ойворгон зангаас үүдэж эрдэнэт хүний амь эрсэдсэн үйл явдал ар араасаа дуулдаж, сонсогдох болсон нь биднийг эргээд түгшээх болов. Шатахуун ачсан ачааны машин осолдож, хоёр хүн амиа алдсанаас эхлээд хээр хөдөө хоёр хүүхдээ орхиж явсан санамсаргүй болон тоймжиргүй үйлдлийн тухай мэдээ цагдаагийн байгууллагад бүртгэгдэх болсон нь үүний илрэл.

Хамгийн сүүлд улсын цолтой нэгэн бөх төрөлх нутагтаа амарч яваад Бэлтэсийн голын усанд автомашинтайгаа живж амиа алдсан харамсалтай хэрэг гарлаа.

4-49 насны зургаан хүн “Ланд круйзер-80” маркийн автомашинд сууж яваад ийн энджээ. Осол болох үед өрхийн тэргүүн хамгийн түрүүнд хамт явсан жирэмсэн охиноо машинаас гаргаад эргэж эхнэр хүүхдүүдээ авахаар буцан орсон байна. Хэдхэн хормоор хэмжигдсэн энэ хугацаанд автомашин урсах явцад 26 настай, хөл хүндтэй бүсгүй зориг гарган бууж, явганаар гол гатлан нөгөө эрэгт нь гарч, Хатгал тосгоны Онцгой байдлын хэлтэст дуудлага өгч амжсан байна.

Гэвч охины аав, ээж, дүү нар нь эргэж ирсэнгүй. Түүнтэй хамт үлдсэнгүй. Нэгэнт оройтсон байв. 

Дуудлагын дагуу ирсэн Онцгой байдлын болон Цагдаагийн газрын алба хаагчид тухайн өдрийнхөө 09.40 цагт дөрвөн настай Т-ын цогцсыг автомашины тээшнээс гарган авсан гэнэ. Мөн ослын цэгээс 6-13 км-ийн зайтай газраас 49-тэй Б, 48-тай С, 20-той Б, 10 настай Б-гийн цогцсыг олж, цагдаагийн байгууллагад хүлээлгэн өгчээ. Хөл хүндтэй бүсгүй амь тээн гарсан ч түүний гэр бүлийн таван хүний амийг Бэлтэс гол "урсгаад" аваад явжээ.

Дэндүү харамсалтай, эмнэгэлтэй гэмээр хүнд гарз нэгэн гэр бүлд ийн тохиолджээ. Өнөөдөр хүн бүр уг ослын тухай бичиж, харуусаж, бөхөд хайртай Монгол түмэн нийтээрээ эмгэнэн гашуудаж, дурсан санаж байна.

Хамгийн гол нь үрсийнхээ аав, ханийнхаа түшиг, амьдралын тулгуур багана, өрхийн тэргүүн болсон тэрбээр нарт хорвоод дуугаа хадаан мэндлэх зээгээ хүн болоосой, хүний дайтай яваасай гэж хүссэндээ тулгар гэдэстэй охиноо нэн түрүүнд уснаас, ослоос аварч, гаргахыг эрмэлзсэн нь өөрийн эрхгүй зүрх зүсэж, өр өвдмөөр. Аав, хань, өрхийн тэргүүний хувиар тэр аюул, осол нүүр тулжээ.

Үрээ гэсэн түүний сэтгэл, өөрийг нь хурцалснаар эргэн аюулыг сөржээ. Эрмэгхэн биед багтаж яддаг бүхий л эр зоригоо энэхэн үе, тэрхэн хугацаанд гаргасан нь эцэг хүний хайр энэрэлийг ямар ч өнгө будаггүйгээр харуулсан мэт. Өнөөдөр тэр алга. Бусад нь ч...

Өнөөдөр тэр хүн үгүй ч ур удмыг нь залгуулах нэгэн энэ хорвоод мэндлэх нь сайхан. Амьдралын, үр хүүхдийнхээ төлөө аюулыг ч үл ажран, амь биеэ золин тэмцсэн түүний алдрыг мөнхөлье.

С.Гандөл