Д.Загджавыг Хан-Уулынхан мэднэ. Засаг дарга байсан гэдгээр нь. Улс төрд үлдээсэн түүний мөр нь УИХ-ын гишүүн. Цагтаа найман жил дүүргийн Засаг даргаар ажилласан түүнийг Байгаль орчны яамны Төрийн нарийн бичгийн даргаар очиход тухайн үеийн Иргэний зориг намаас эсэргүүцэж мэдэгдэл хийж байв. Тэгэхдээ “Д.Загджав дүүргийн Засаг дарга болсноор манай дүүргийг сүйрүүлэх нь. Тус дүүргийн нутаг дэвсгэрээр бизнес хийж дууслаа. Ямар хүний гар хөл вэ” хэмээн мэдэгдэж л байлаа. Энэхүү мэдээлэл, эсэргүүцэл Д.Загджавын улс төрийн намтарыг хойш чангааж чадаагүй. УИХ-ын гишүүнээр сонгогдсон тэрбээр 2012 оныг хүртэл эрхэлсэн ажлаа гүйцэтгэснээс өөрөөр парламентад тодроогүй.

Монголын Энхтайван, найрамдлын байгууллагын ерөнхийлөгчийн хувиар Д.Загджав улс төрд тодорч эхэлсэн үе түүнд бий.

У.Хүрэлсүхийг Ерөнхий сайд болоход танхимд нь Уул уурхай, хүнд үйлдвэрийн салбарыг хариуцахаар очсон Д.Сумъяабазарын Дэд сайд, орлогч болсон нь харьцангуй таниулж эхэлсэн байдаг. Эхлээд тэр БНХАУ, Хонгконг хооронд үүссэн зөрчлийг “Хонконгийн жагсаалын цаана барууны тусгай албадын оролцоо байна уу гэсэн таамаглал ч явж байна” хэмээн хэвлэлд байр сууриа илэрхийлж, шуугиан тарьж байв.

Удалгүй “Тэвчээрт хязгаар бий. Энэ бол Монголын ард түмний санаа бодлын илэрхийлэл юм. Би “Рио Тинто” компанийг Монголын хөгжилд тодорхой хувь нэмэр оруулахыг шаардаж байна. “Оюутолгой” компани хөрөнгө оруулалтын гэрээгээр хүлээсэн зарим үүргээ биелүүлэхгүй ирлээ” гэсэн байдаг. Өөрөө Оюу Толгойн Хөрөнгө оруулалтын гэрээг УИХ-аар баталж, Засгийн газарт үүрэг өгсөн тогтоолыг батлах үед дэмжиж, гарын үсэг зурж байсан гишүүний нэг.

Ээлж дараалсан түүний энэ мэдэгдэлтэй холбогдуулж, салбарын сайдаар ажиллаж байсан Д.Сумъяабазар “Манай яамны дэд сайд Д.Загджав Оюу Толгойн үйл ажиллагааг зогсоох ёстой гэсэн байр суурийг илэрхийлсэн. Энэ нь манай яамны, сайдынх биш. Мөн Засгийн газрын байр суурь ч биш гэдгийг хэлье.

Хэрэв дэд сайд Д.Загджав Засгийн газрын байр сууриас өөр асуудлыг олон нийтэд дахин түгээвэл энэ хүнийг эргүүлэн татах талаар Засгийн газрын хуралдаанд оруулах болно” гэж байв.

Энэ асуудал дахин сөхөгдөөгүй. Сайд асан Д.Сумъяабазар дахин дуугараагүй, тэгсхийгээд намжсан. Өмнөх Засгийн газрын бүтцэд хариуцсан салбарынхаа Дэд сайдаар ажиллаж байсан Д.Загджав танхимынхаа баримталж буй бодлого, гаргах шийдвэрээс тэс ондоо зүйлийг ярьж, зөвхөн өөрийн эрх ашигт нийцүүлж, хувийн тоглолт хийж ирснийг зөвхөн дээрх хоёр жишээнээс харж болно. Гагцхүү түүнийг Ерөнхий сайдаар улирсан У.Хүрэлсүхийн танхимаас, Хууль зүй, дотоод хэргийн сайд Х.Нямбаатар эрхлэх асуудлынхаа хүрээнд Шүүхийн шийдвэр гүйцэтгэх ерөнхий газрын даргаар томиллоо.

Ардын нам сонгуулийн үр дүнгээр ялалт байгуулах бүртээ Д.Загджавт албан тушаал өгч ирсэн гэх шүүмжлэл түүнийг дагах бус бүр ороодог. Эрхэлж, эрхлүүлэхээр томилдог албан тушаал бүр өөрийнх нь, заримдаа бусдын санаачилгаар гэдэг нь үнэний ортой л хардлага, шүүмжлэл.

Хамгийн гол нь, удахгүй буюу ирэх жил 100 жилийн ойгоо тэмдэглэн өнгөрүүлэх, улсын хэмжээнд 3000 гаруй алба хаагчтай тус агентлагийг юуны учир Д.Загджавт хариуцуулах болов гэдэг нь өөрөө эргэлзээ төрүүлэм биш гэж үү?.

Хуулиараа уг байгууллагын удирдлага Ерөнхийлөгчийн зарлигаар цэргийн дээд цол генералын мөрдэстэй байхаар хуульчилсан. Энэ байгууллагын алдаа оноо, зовлон жаргалыг нэгд нэгэнгүй мэдэх, гарын арван хуруу шигээ барагцаалах хэмжээнд хүрсэн,  энэ байгууллагад 30 гаруй жил ажилласан экс дарга Д.Дамдинцэрэнг улираах атал Д.Загджав намын томилгоогоор “айлчлан” ирсэн нь өөрөө асуудал.

Тэгээд ч Хувийн тоглолт нь дэндсэн Д.Загджавыг хуулийн хэрэгжилтийг хэрэгжүүлж, сахиулах байгууллагын “манаач”-аар томилсонд яг ямар учир байна вэ?! Хан-Уулынхан, тэр тусмаа татвар төлөгчид лав түүнд өргүй.

Г.Эрхэс