Ерөнхий сайд У.Хүрэлсүхийн танхимд “давхар дээл”-тэй дөрвөн сайд бий. Үүнд Засгийн газрын Хэрэг эрхлэх газрын дарга Л.Оюун-Эрдэнэ, Сангийн сайд Ч.Хүрэлбаатар, Хууль зүй, дотоод хэргийн сайд Х.Нямбаатар, Байгаль орчин, аялал жуулчлалын сайд Д.Сарангэрэл нар багтана. Үндсэн хуулиар Ерөнхий сайдад олгосон эрх мэдлийн хүрээнд парламентаас томилсон УИХ-ын гишүүд гэсэн үг. Нэг талаараа танхимын бусад гишүүдтэй нь харьцуулахад парламентад кноп дарагч. Нөгөө талаар сайдын суудлаас буусан ч сонгогдсон тойргийнхоо төлөөлөгч гэдгээрээ УИХ-ын гишүүний албатай үлдэх “алдах” юмгүй хүмүүс.
Гэхдээ “давхар дээл”-тэй, алдах юмгүй гээд хариуцсан ажлаа халтуурдаж, салбараа унагаана гэсэн үг биш. Тус тус ажлаа сайн хийхээс тухайн сайдын намтар сайн, муугаараа арвижих учраас.
Гэтэл зарим чиг үүргийн яамны сайд түрүүчээсээ олон нийтийн шүүмжлэлд өртөж эхэлсний нэг нь Х.Нямбаатар.
Ерөнхий сайд У.Хүрэлсүхийн өмнөх танхимд хамгийн нөлөөтэй ажиллаж ирсэн Ц.Нямдоржийн халааг авсан түүний хувьд 2016-2020 онд УИХ-ын гишүүний алба хашихдаа Хууль зүйн байнгын хороог удирдаж явсан туршлагатай.
Үүгээр зогсохгүй Эрүү, Зөрчлийн тухай болон өмнөх парламентын үед баталсан томоохон хуулийн төслийг гардаж гүйцэтгэсэн гэдгээр нь хуулийн салбарынхан түүнийг эчнээ танина.
Гэвч Х.Нямбаатар сайд харьяа агентлагийнхаа үйл ажиллагаатай танилцах үеэрээ гаргасан үйлдэл нь өнөөдрийг хүртэл шүүмжлэлд өртөх шалтгаан болж байх шиг.
Тодруулбал, салбартаа шинэхэн сайд тэрбээр цагдаагийн байгууллагын үйл ажиллагаатай танилцах үеэрээ нийт бие бүрэлдэхүүн, тэдгээрийн удирдлагатай утсаар ярьж "мэндчилсэн" нь олны эгдүүцлийг төрүүлэв. Дотоодын цэргийн алба хаагчид сайдыгаа ирэх сургаар эгнэн жагсаж угтах үеэр албаны машинаас бууж ирсэн сайд утсаараа ярин бие бүрэлдэхүүний удирдлагатай гар барин мэндчилж буй бичлэг одоо ч хөвөрсөөр буй нь үүний илрэл.
Хачирхалтай нь, сайдынхаа эл үйлдлийг цагдаагийн байгууллага зүгээр "өнгөрөөх"-ийг хүссэнгүй. Харин ч тодруулга гаргаж бодит байдалтайгаа эвлэрч байх юм. Тэдний гаргасан тодруулагад "Монгол Улсын Их Хурал, Засгийн газрын гишүүн, Хууль зүй, дотоод хэргийн сайд Х.Нямбаатар 2020 оны 07 дугаар сарын 17-ны өдөр цагдаагийн байгууллагын үйл ажиллагаатай танилцаж, алба хаагчидтай цахим уулзалт хийж, санал, хүсэлтийг сонсож, ажлын чиглэл өгч ажилласан.
Мөн 2020 оны 07 дугаар сарын 21-ний өдөр Дотоодын цэргийн үйл ажиллагаатай танилцсан бөгөөд сүүлийн өдрүүдэд Хууль зүй, дотоод хэргийн сайдын утсаар ярьж буй бичлэгийг олон нийтийн сүлжээнд тавьж, шүүмжлэлтэй хандаж байгаа нь бодит байдалтай нийцээгүй ташаа мэдээлэл бөгөөд уг бичлэг албан ёсны арга хэмжээ эхлээгүй байх үеийнх болно" гэжээ.
Угтаа бол "Шинэ халаатаа өмсөөрэй, ширээнийхээ бүтээлгийг солиорой" гэх зарчмаар Дотоодын цэргийнхэн сайдыгаа угтаж авсан байж таарна. Гэвч хар машинаасаа буусан сайд нь гар утсаараа хэн нэгэнтээ ярьж, тэдэнтэй мэндчилсэн нь эргээд өөрсдийг нь залруулга гаргах шалтгаан болов.
Монгол Төрийн гурван өндөрлөг хэмээдэг Ерөнхийлөгч, УИХ-ын дарга, Ерөнхий сайд хаа нэгтээ албан томилолт хийхдээ бие бүрэлдэхүүнтэй гар утастайгаа ёсолж, мэндчилж, амрыг нь эрж байсан түүх үгүй болохоор Х.Нямбаатар сайд эл үйлдэл олон нийтэд эмзэг тусах нь мэдээж.
Тэгээд ч цагдаагийн байгууллагын албан ёсны сайтад сайдынхаа үйлдлийг залруулж, тодруулга гаргасан нь тэрхүү үйлдлийг тойрсон шүүмжлэлийг улам өрдөж орхилоо.
Г.Эрхэс
Сэтгэгдэл (22)