Ерөнхий сайд асан С.Баяр нарт холбогдох хэргийн шүүх хурал өнөөдөр болж шийдвэрээ гаргалаа. Улмаар Ерөнхий сайд асан С.Баярт 5, “Петровис” компанийг үүсгэн байгуулагч Ч.Даваанямд 2 жил хорих ял тус, тус оноох шийдвэрийг гаргасан юм.
Ингэхдээ хууль бусаар олсон гэх 5.5 тэрбум төгрөгийг хурааж, улсын орлого болгох шийдвэр гаргажээ.
Ерөнхий сайд асан С.Баярын тэргүүлсэн Засгийн газар 2009 онд Рио Тинто компанитай хамтран ажиллах хөрөнгө оруулалтын гэрээ байгуулсан. Түүнийг Ерөнхий сайдаар ажиллаж байхдаа “Петровис” компанид давуу байдал олгож, Оюутолгой компанид шатахуун нийлүүлэх гэрээ хийлгэсэн байж болзошгүй, мөн АНУ-д амьдардаг охиных нь нэр дээр бүртгэлтэй үл хөдлөх хөрөнгө нь Оюутолгой төслийг байгуулсны дараа бий болсон байж болзошгүй гэж үзсэн байдаг.
Харин С.Баярын зүгээс “Хийгээгүй хэргээр маань шүүж байна. Гэхдээ өчигдрийн шүүх хуралдаанаар шатахуун нийлүүлэхэд нөлөөлсөн байж болзошгүй гэдэг нь няцаагдлаа. 2009 онд байгуулсан гэрээг нь 2008 онд байгуулсан гэрээтэй харьцуулахад “Петровис” компанийн нөхцөл нь дордсон байгаа.
Хоёр дахь буруутгадаг асуудал нь АНУ-д олон хаустай гэдэг. Авлигатай тэмцэх газраас АНУ-ын хууль хяналтын байгууллагад хандахад Эрүүгийн хэлтсээс нь олон хуудас материал ирүүлсэн.
Миний охин, эхнэр, найз Ч.Даваанямын банкны хуулга ирсэн. Биднийгээ буруутгах биш харин ч цагаатгах баримт ирсэн. АНУ мөнгөний эх үүсвэр талаас нь сайн нягталдаг. Хэрэв АНУ-ын нутаг дэвсгэр дээр мөнгө угаах ч юм уу хууль бусаар мөнгө эргэлдүүлж бизнес хийсэн бол Монголын хуулийн байгууллагаас хандсан хандаагүй, нутаг дэвсгэр дээр нь гэмт хэрэг үйлдэгдэж байгаа учраас аль хэдийнэ биднийг шалгаад буруутай бол шийтгэл ногдуулчихсан байх ёстой.
Банкных нь хяналт жигдэрчихсэн орон. Шүүх эцсийн шийдвэрээ удахгүй гарна" хэмээн мэдэгдээд байсан юм.
Мөн тэрбээр "Явах өдөр байхад ирэх өдөр ирнэ. Салах өдөр байхад учрах өдөр ирнэ” хэмээн цахим орчинд өөрийн сэтгэгдлээ илэрхийлээд байв.
С.Сүлд
Сэтгэгдэл (24)