Тагнуулын ерөнхий газрын дарга асан хошууч генерал Б.Хурц, Улсын ерөнхий прокурорын орлогч асан Г.Эрдэнэбат нарын есөн хүнд Төв аймаг дахь Сум дундын Эрүүгийн хэргийн анхан шатны шүүхээс 1-3 жил ял оноосон. Ингэхдээ Б.Хурц, Г.Эрдэнэбат нарт тус бүр гурван жилийн ял оноож, нээлттэй хорих ангид эдлүүлэхээр шийдвэрлэсэн юм.

Ингэснээр төр нийгмийн зүтгэлтэн, Дэд бүтцийн сайд асан С.Зоригийн амь насыг хөнөөсөн хэрэгт сэжигтэн, яллагдагчаар татагдаж шүүхээс ял ногдуулсан Б.Содномдаржаа, Т.Чимгээ нарыг эрүүдэн шүүсэн гэх асуудал дахин сөхөгдөх нөхцөл байдал үүсээд байна.

Хууль зүй, дотоод хэргийн сайд Х.Нямбаатарын өгсөн тайлбараар эл хэргийг шинээр илэрсэн нөхцөл байдал гэсэн хуулийн үндэслэлээр дахин шалгаж магадгүй гэх. Харин Б.Хурц нарын зүгээс эрүүдэн шүүсэн гэх асуудал байхгүй хэмээн шүүх байгууллагад холбогдох баримт, тайлбараа гаргаж өгсөн ч тэднийг буруутай гэж үзэн ял оноогоод байгаа юм. Одоогоор Б.Хурц нарт холбогдох хэргийн талаарх дэлгэрэнгүй тайлбар мэдээлэл олон нийтэд ил болоогүй ч С.Зоригийн амь насыг хороосон хэрэгт холбогдуулж, шүүхээс ял сонссон Т.Чимгээ, Б.Содномдаржаа нартай холбоотой асуудлын Тагнуулын ерөнхий ерөнхий газрын дарга Б.Хурц хэвлэлд хэрхэн ярьж байсныг сийрүүлэн хүргэе. 

Тэрбээр сэтгүүлч Л.Мөнхбаясгалангийн бэлтгэн хүргэдэг "Цензургүй яриа" нэвтрүүлэгт оролцох үеэрээ “Тагнуулын даргыг ажлаа өгөхөд УИХ дээр зохион байгуулалттай авчраад, шоу хутгасан. Нууцын зэрэглэлтэй юмыг ярь гээд л, ярихгүй бол ярихгүй байна гээд л.

Баавартай гэдэг нь юу ч юм. Байгаагаараа л ярьсан байна. Эндээс нэг гишүүн битгий ярь гээд, эндээс нэг хүн болио гээд. Тэгээд би инээчихсэн шд. Хажуунаас нь харахаар инээдэмтэй л харагдаж байсан.

Юу ч байж болно. Одоо тэр ял авсан хүмүүс хэргээ задалъя гээд байгаа шүү дээ. Би нарийн юм руу нь ерөөсөө ордоггүй. Прокурорын хяналтад ажлын хэсэг ажиллаж байхад би орох ёсгүй. Хуулиараа хаалттай. Ажлын хэсгийн гишүүдийн аюулгүй байдал болон бусад юмыг хариуцаж байсан.  

Ж.Батзандан гишүүн сайн мэддэг юм шиг байна лээ. Тэр үед Ц.Нямдорж өөрөө Хууль зүй, дотоод хэргийн сайд байсан. Ерөнхийлөгч Н.Багабанди, Ерөнхий сайд Н.Энхбаяр гуай байсан. Энэ хэрэг нууцлалын зэргээс гараагүй учир би яримааргүй байна. Юу үнэн гэхээр Д.Энхбатыг хулгайлж авчраагүй баривчилж авчирсан. Германы тал авчирч өгсөн. Доктор Фитце гээд Германы хууль хяналтын байгууллагад ажилладаг, монголоор ярьдаг хүн мэднэ.

Тэр хүн түрээд гаргаж өгснийг би холоос харсан шүү. Тэр үед би Унгарт ажиллаж байсан. Авчраад цагдаад хүлээлгэж өгсөн. Хуулийн дагуу явагдсан ажиллагаа шүү дээ. Д.Энхбатыг авчрах нь Багануур дүүргийн шүүхийн шийдвэртэй байсан.

Гүйцэтгэгчийн хэрэг илэрсэн. Цагдаа, тагнуул, прокуророос ажлын хэсэг гарч шалгасан. Энэ хэрэгт оролцсон хоёр хүн хэргээ хүлээсэн. Гэхдээ тэдний үгээр биш хөндлөнгийн нотлох баримтаар энэ хэрэг шүүх рүү явсан. C.Зоригийн хэрэг Эрдэнэтээс гаралтай. Наад хүүхдүүд чинь Эрдэнэтэд амьдарч байсан шүү дээ” хэмээж байжээ.

Г.Эрхэс