Ерөнхийлөгч асан, МАХН-ын дарга Н.Энхбаяр Өмнөговь аймгийг зорьж тэнд хийж байгаа төмөр замын бүтээн байгуулалттай танилцжээ. Энэ тухайгаа “Миний бие Ерөнхийлөгчөөр ажиллаж байхдаа Тавантолгойн лицензийг эзэмшигч хүмүүстэй ярилцаж байгаад бүхэлд нь төрийн өмчид авсан нь зөв алхам болсныг цаг хугацаа харууллаа” хэмээн хэвлэлд өгсөн ярилцлагадаа дурджээ. Мөн “Тавантолгойн ордыг төрийн өмчид авснаас хойш хувьдаа авахаар оролдоход Тухайн үед УИХ-ын даргаар ажиллаж байсан З.Энхболд, өнөөгийн Ерөнхийлөгч Х.Баттулга нар хувийнханд буцааж өгөлгүйгээр төрийн өмчид авч үлдсэн нь сайн хэрэг” хэмээн тодотгосон байна.
2020 оны УИХ-ын ээлжит сонгуулийн үр дүнг хүлээн зөвшөөрөхгүй гэдгээ санал хураалтын үр дүн гарсан цагаас хойш илэрхийлж, байр сууриа илэрхийлж байсан түүний хувьд саяхныг хүртэл нам жим байдалд шилжээд байв.
Харин Ерөнхийлөгч Х.Баттулга МАХН-ын дарга Н.Энхбаярт урилга явуулсны хүрээнд тэрбээр Тавантолгой-Зүүнбаян чиглэлийн 416 км шинэ төмөр замын явцтай танилцсан нь энэ аж. Ерөнхийлөгч асан Н.Энхбаяр "Төмөр замын асуудал нийгмийн анхаарлыг татаад олон жил болж байна. Миний хувьд Ерөнхийлөгчөөр ажиллаж байхдаа төмөр замын бодлогын тухай шийдвэр гаргах асуудлыг ҮАБЗ-өөр хэлэлцэж байснаа санаж байна.
Тухайн үед өргөн царигтай төмөр зам барих нь зүйтэй гэсэн шийдвэрийг гаргасан нь өнөөдөр зөв байжээ гэж харж байна" гэдгийг онцолжээ.
Цагтаа Монгол Улсын Ерөнхий сайд, УИХ-ын дарга, Ерөнхийлөгчөөр ээлж дараалан сонгогдон ажиллаж байсан Н.Энхбаяр даргын амнаас төмөр замын өргөн царигтай болох тухай дурдсан нь өөрийн эрхгүй анхаарал татна. Санаж байгаа бол 2014 онд УИХ-ын чуулган, Байнгын хорооны хуралдаанаар Төрөөс төмөр замын тээврийн талаар баримтлах бодлогын хэрэгжилтийг хангах зарим арга хэмжээний тухай тогтоолын төслийг хэлэлцэж, гишүүдийн олонхи дэмжиж байлаа. Энэ хүрээнд “Тавантолгой-Гашуунсухайт, Сайншанд-Ханги, Хөөт-Бичигт, Нарийнсухайт-Шивээхүрэн чиглэлийн төмөр замын шинэ шугамыг 1435 мм-ийн царигтай.
Арц суурь-Эрдэнэт, Тавантолгой-Сайншанд-Баруун-Урт-Хөөт-Чойбалсан, Хөөт-Нөмрөг чиглэлийн төмөр замын шинэ шугамыг 1520 мм-ийн царигтай байх ажлыг зохион байгуулж, хэрэгжүүлж ажиллахыг Монгол Улсын Засгийн газарт даалгасугай” хэмээн өөрчлөн найруулах санал оруулсан байдаг.
Тухайн үед өөрийн хүсэлтээр сайдын суудлаасаа бууж, сул гишүүний орон тоонд шилжээд байсан одоогийн Ерөнхийлөгч Х.Баттулга "Бид аймаг бүрээр хилээ сэтлээд нарийн цариг оруулж ирж байгаа бол боловсруулах үйлдвэрийг мартах хэрэгтэй. Далайд гарцгүй манай улс төмөр замаа дотооддоо боловсруулах үйлдвэр, экспортлох бүтээгдэхүүн гэсэн эдийн засагтайгаа уялдуулах ёстой. Түүнээс бид компаниудын лоббигоор ингэж хилээ сэтлэж болохгүй" хэмээн эсэргүүцэж байсан юм.
Гэхдээ УИХ-аас Засгийн газарт даалгасан уг тогтоолын төсөл бодит хөрсөн дээр бууж хэрэгжээгүй юм.
Гагцхүү 2016 оны УИХ-ын сонгуульд өвдөг шороодож, удаах жил нь тав дахь Төрийн тэргүүнээр сонгогдсон Х.Баттулгын төмөр замын өргөн, нарийн царигт хандуулах анхаарал нь улам бэхжиж, өдгөө Тавантолгой-Зүүнбаян чиглэлд 414 км төмөр замыг цэргүүдээр бариулж эхлээд буй. Харин салбарын сайдаар ажиллаж байхдаа эхлүүлсэн Тавантолгой-Гашуунсухайт чиглэлийн 267 км төмөр замыг ашиглалтад оруулах хугацааг 2022 он болгож өөрчлөөд байгаа юм.
Сонирхолтой нь, ирэх онд болох Ерөнхийлөгчийн сонгуульд АН-аас дахин дэвшихээр бэлтгэлээ базааж эхэлсэн гэх Төрийн тэргүүн Х.Баттулгад МАХН-ын дарга Н.Энхбаярын дэмжлэг яагаад хэрэгтэй болов гэдэг нь сонин. Тэгээд ч Ерөнхий сайд асан Н.Алтанхуяг МАХН-ын дарга Н.Энхбаяртай урт хугацаанд хамтран ажиллах гэрээ байгуулахад нь хамгийн ихээр эсэргүүцэж, Засгийн газрыг нь хүртэл огцруулахад голлох үүрэгтэй оролцсон нь Х.Баттулга, З.Энхболд тэргүүтэй МоАХ, "Шонхор" фракцынхан.
Тийм атал Төрийн тэргүүн Х.Баттулгын зүгээс экс Ерөнхийлөгч Н.Энхбаярт урилга явуулж, төмөр замын бүтээн байгуулалттай танилцуулсны цаад шалтгаан нь асуулт дагуулах мэт. Цаг цагаараа байдаггүй гэдэг нь энэ байж болох ч Н.Энхбаярт урилга явуулсан Ерөнхийлөгч Х.Баттулгын нүүдлийн ард юу нуугдаж байгаа нь өнөөдөртөө асуултын тэмдэг.
Гэхдээ УИХ-ын гишүүн асан О.Баасанхүү нэгэнтээ "Н.Энхбаяр дарга хорих ангид өлсгөлөн зарлаад 11 хоноод яг амь тавих гэж байхад би ангийнхаа найз А.Гансүх дээр гүйж очоод “Женко” Х.Баттулгатай уулзуулаадах гэсэн юм. Тэгээд Женкогийн өрөө рүү дайрах шахан ороод “Н.Энхбаярын өмгөөлөгч байна. Хоёулаа Ц.Элбэгдорж Ерөнхийлөгч рүү явъя” гэсэн. Тэр үед Х.Баттулга Ерөнхийлөгч Ц.Элбэгдорж руу яриад Н.Энхбаяр даргыг 461-ийн эмнэлэгт хэвтүүлсэн юм. Тэгээд өлсгөлөнгөө зогсоосон. Х.Баттулга амийг нь аварсан хүн. Гэтэл амийг нь аварсан хүний хүн гээд намайг хардах юм. Үнэндээ миний хувьд Х.Баттулга гишүүний зөв зүйлийг дэмжиж, бурууг буруутгадаг" хэмээн ярьж байсныг энд тодотгох нь зүйн хэрэг. Магадгүй МАХН-ын даргад одоогийн Ерөнхийлөгчид өр төлөх ямар нэгэн шалтгаан байж мэдэх.
Г.Эрхэс
Сэтгэгдэл (31)