Зэвсэгт хүчний хүндэт харуулын 032 дугаар ангид алба хааж байсан цэргүүд нэгнийгээ дэглэж, шийтгэж буй бичлэг олон нийтэд ил болж, шүүмжлэл дагуулаад байгаа билээ. Тэгвэл энэ талаар Зэвсэгт хүчний жанжин штабын Хэвлэлийн төлөөлөгч Б.Отгонбаяраас тодрууллаа.

Тэрбээр "Энэ үйл явдал болж өрнөсөн нь үнэн байна. Өнгөрсөн оны есдүгээр сард Зэвсэгт хүчний 032 дугаар анги дээр дүрмийн бус харилцааны зөрчил гарсан болох нь урьдчилсан байдлаар тогтоогдсон. Тиймээс тухайн үеийн асуудлыг шалгахаар болсон. Шинэ цэргүүдтэй дүрмийн бус харьцсан цэргүүд халагдсан бол нөгөө цэргүүд нь одоо албаа хааж байгаа. Ийм ёсзүйгүй, алдаа гаргасан явдалд харамсаж, цэргийн алба хаагчид болон тэднийхээ ар гэрийнхнээс уучлалт хүсч байна" гэлээ.

Б.Баатар