Ховд аймгийн Зэрэг сумын харьяат Улсын хүчит заан Баярхүүгийн Бат-Өлзий 2023 онд нийт зургаан удаа түрүүлж, дөрвөн удаа үзүүр булааж, таван удаа их шөвөг, хоёр удаа дунд шөвөгт үлджээ. Түүний түрүүлж үзүүрлэсэн барилдаануудыг эргэн сануулъя.
Түрүүлсэн барилдаанууд
Хоёрдугаар сарын 05 - "Жем Интернэшнл" ХК-ийн нэрэмжит, Монгол улсын харцага цолны хүндэтгэлийн барилдаанд тэрбээр Улсын арслан Р.Пүрэвдагватай үлдэж түрүүлсэн.
Хоёрдугаар сарын 19 - Үзэсгэлэн болгогч хэмээх усан туулай жилийн сар шинийн баярт зориулсан улс, аймгийн цолтой бөхчүүдийн барилдаанд тэр Улсын даян аварга Н.Батсуурьтай үлдэж түрүүлэв.
Гуравдугаар сарын 12 - Өмнөговь аймгийн Манлай сумын харьяат, Улсын арслан Гомбо-Аюушийн Дэмүүлийн нэрэмжит барилдаанд Улсын гарди Ө.Бат-оршихоор найм даван түрүүлэв.
10 дугаар сарын 28 - Нийслэл Улаанбаатар хот үүсэн байгуулагдсаны 384 жилийн ойд зориулсан барилдаанд Улсын манлай заан Б.Пүрэвсайханаар найм даван түрүүлжээ.
11 дүгээр сарын 05 - Монгол улсад авто замын салбар үүсэж хөгжсөний 94 жилийн ой, автозамчдын баярт зориулсан барилдаанд тэр Цэргийн заан Ө.Батсууриар долоо давж түрүүлэв.
11 дүгээр сарын 26 - Бүгд найрамдах улсаа тунхаглаж, анхдугаар үндсэн хуулиа баталсны 99 жилийн ойд зориулсан барилдаанд Улсын харцага О.Мөнх-Эрдэнээр долоо даван түрүүлэв.
Үзүүр булаасан барилдаанууд
Гуравдугаар сарын 11 - Завхан аймгийн Тосонцэнгэл сумын 100 жилийн ойд зориулсан, Санжмятавын Шагж аваргын нэрэмжит барилдаанд Улсын арслан Б.Орхонбаярт унаж үзүүр булаав.
Гуравдугаар сарын 17 - Монгол цэргийн өдөр, Орчин цагийн зэвсэгт хүчин үүсэн байгуулагдсаны 102 жилийн ойд зориулсан барилдаанд Улсын аварга О.Хангайд унаж үзүүрлэв.
Наймдугаар сарын 01 - Тулгар төрийн 2232 жил, Их Монгол улс байгуулагдсаны 817 жил, Үндэсний эрх чөлөө тусгаар тогтнолоо сэргээн мандуулсаны 112 жил, Ардын хувьсгалын 102 жил, Хантайшир уулын аймаг байгуулагдсаны түүхт 100 жилийн ой, Говь-Алтай аймгийн баяр наадмын хүчит 256 бөхийн барилдаанд Улсын аварга О.Хангайд өвдөг шороодож үзүүрлэв.
11 дүгээр сарын 24 - Дорноговь аймгийн Сайншанд суманд болсон Улс тунхагласны ойн баярт зориулсан барилдаанд Аймгийн арслан Э.Мөнхжаргалд унаж үзүүрлэсэн.
Л.Сайнаа
