Дэлхийн жүдогийн холбооны энэ оны отгон тэмцээн Токиогийн Их дуулга ирэх 12 дугаар 02-03-ны өдрүүдэд зохион байгуулагдах гэж байна. Тэмцээнд дэлхийн 88 орны 320 нь эрэгтэй 217 нь эмэгтэй жүдоч оролцохоор мэдүүлгээ өгчээ. Их дуулгыг угтаж бид танд онцлох жингийн шилдэг тамирчдын жагсаалтыг танилцуулж байна. 

1. Франц - Понт Бландини - 25 настай

Тэрбээр 5030 оноотойгоор дэлхийн чансааны гуравдугаар байрт бичигдэж байна. Тэрбээр энэ онд Тель-Авивын Их дуулга, Анталиягийн Их дуулга тэмцээнүүдэд аваргалсан. Мөн өнгөрсөн сард болсон Абу Дабигийн Их дуулга тэмцээнд гуравдугаар байрт шалгарчээ. Харин энэ оны ДАШТ-д шагналт тавдугаар байрыг эзэлсэн юм. 

2. Казакстан - Абужакынова Абиба - 26 настай 

Дэлхийн чансааны зургадугаар байрт бичигдэж байгаа тэрбээр саяхан болсон Азийн наадмаас хүрэл медаль зүүсэн билээ. Энэ онд тэр Тбилисийн Их дуулгаас хүрэл медаль хүртэж, ДАШТ-д тавдугаар байрт орсон. 

3. Япон - Цүдода Нацүми - 31 настай 

Дэлхийн чансааны долдугаар байрт байгаа тэрбээр ДАШТ, Азийн наадмаас хос алтан медаль хүртсэн. Түүнчлэн өнгөрсөн оны ДАШТ -д мөн л аваргасан нэгэн. Түүний хувьд мөн өнгөрсөн оны Токио Их дуулгаас хүрэл медаль хүртэж байв. 

4. Португал - Коста Катарина - 27 настай 

Дэлхийн чансааны наймд эрэмбэлэгдэж буй тэрбээр өнгөрсөн зургадугаар сард болсон Улаанбаатар Их дуулгаас хүрэл медаль хүртэж байв. Түүнчлэн энэ онд Унгарын Мастерс, Абу Дабигийн Их дуулгын шагналт байранд орсон бол ЕАШТ-ээс мөнгөн медаль зүүжээ. 

5. АНУ - Лаборде Мария Силя - 33 настай 

Унгарын Мастерсаас мөнгөн медаль зүүсэн даруй энэ онд тэрбээр Пан Америкын наадам, Пан Америк - Далайн орнуудын наадмаас тус тус хүрэл медаль зүүжээ. Тэрбээр мөн энэ жиндээ хамгийн ахмад тамирчны тоонд багтана. 

6. Монгол - Бавуудоржийн Баасанхүү - 24 настай 

Манай тамирчин дэлхийн чансааны 12 дугаар байрт бичигдэж байна. Анталиягийн Их дуулга, Унгарын Мастерсаас хүрэл медаль хүртсэн. Харин Азийн наадамд долдугаар байрт шалгарсан юм. 

7. Итали - Малина Франческа - 30 настай 

Энд онд тэрбээр Австрийн Гранпри тэмцээнээс хүрэл медаль зүүсэн. Түүнчлэн Абу Дабигийн Их дуулга, Тбилисийн Их дуулга, Казахстан Барисы Их дуулга тэмцээнүүдэд шагнал тавдугаар байрт шалгарчээ. 

8. Изриаль - Рисони Шира - 32 настай 

Энэ онд тэр Анталиягийн Их дуулгаас мөнгөн медаль хүртсэн нь дэлхийн чансааны 18 дугаар байрт дэвшүүлжээ. 

9. Чили - Варгас Лей Мэри Ди - 26 настай 

Энэ онд тэр Сантьяго Пан Америкийн нээлттэй тэмцээн, Пан Амери-Далайн орнуудын аварга шалгаруулах тэмцээнд аваргалсан. 

10. Испани - Фигуэроа Жулиа - 32 настай 

Тэрбээр өнгөрсөн онд Унгарын Их дуулгаас мөнгө, Абу Дабигийн Их дуулгаас алтан медаль хүртсэн. Мөн ДАШТ-ий тавдугаар байрт шалгарсан юм. 

Л.Сайнаа