NBA-ийн 2023-2024 оны улирлын тоглолтууд үргэлжилж байна. Өнөөдрийн тоглолтод Юта Жазз баг Даллас Маверикс багийг 127:90 харьцаатай буулган улирлын ээлжит ялалтаа авлаа. 

Тэгвэл уг тоглолтод Юта Жазз баг сүүлийн 16 жилийн доторх анхны трипль даблиа хийв. Тодруулбал, багийн довтлогч, Филлиппин-АНУ-ын иргэншилтэй тоглогч Жордан Кларксон 20 оноо, 10 самбараас бөмбөг авалт, 11 оновчтой дамжуулалт өгч уг амжилтыг бататгав. 

Түүний хувьд 1992 онд АНУ-ын Флорида мужийн Тампа хотод төрсөн. 2014 оны драфтын хоёрдугаар тойргийн 46 дугаар сонголтоор Вашингтон Визардс багт сонгогджээ. Түүний хувьд 2014-2018 онд Лос Анжелес Лейкэрс, 2018-2019 онд Кливлэнд Кавалерс багт хүчин зүтгэж, 2019 оноос өнөөг хүртэл одоогийн багтаа хүчин зүтгэж буй. 

Тус багаас 2008 онд Карлос Бүүзэр 22 оноо, 11 самбараас бөмбөг авалт, 10 оновчтой дамжуулалт өгч байжээ. NBA-ийн бусад багуудын хувьд трипль дабль үзүүлэлт нь нэг улиралд цөөнгүй байдаг амжилт боловч Юта Жазз багийн хувьд ховор үйл явдал болсон билээ. 

Л.Сайнаа