Цэргийн цол, чимэг олгох "Бүх цэргийн наадам" амжилттай сайхан болж өндөрлөлөө. 33 дахь удаагийн "Бүх цэргийн наадам"-д хүчний спорт хороодод харьяалагддаг аймаг, цэрэг, сумын цолтой болон залуу 256 бөх хүч сорьсноос Хэнтий аймгийн Галшар сумын харьяат, "Шинэ Анагаах Ухааны их сургууль", “Хан-Хэнтийн аварга” дэвжээний бөх, сумын заан Дэлгэрийн Цэрэнням түрүүлж ЦЭРГИЙН АРСЛАН цол хүртсэн бол Сүхбаатар аймгийн Онгон сумын харьяат, “Хилчин” спорт хороо, "Эвт Чулуу" ХХК, "Бадамлах Нар" ХХК, "Нэгдэл" клуб, “Жавхлант” дэвжээний бөх, аймгийн хурц арслан Нямдоржийн Өсөхбаяр үзүүрлэж, “хичээнгүй” чимэг нэмэв. Тэгвэл бид та бүхэнд түрүү бөх Д.Цэрэннямын тухай сонирхолтой баримтуудыг дэлгэж байна. 

Баримт 1

Тэрбээр 1996 оны зургадугаар сарын 23-нд Хэнтий аймгийн Галшар суманд мэндэлжээ. 

Баримт 2

Түүний биеийн өндөр 184 см, биеийн жин 110 кг. 

Баримт 3

Анх 2013 онд Сумын заан цолыг хүртэж, улмаар 2018 онд хоёр өдөр дараалан цолоо баталж байжээ. Үүнээс өмнө 2016, 2017 онуудад зургаа давж байсан гэдэг. 

Баримт 4

Тэрбээр Сумын заан цолтой болон залуу бөхчүүдийн барилдаанд ЗУРГААН удаа үзүүр булаасан. Мөн түүнд нэлээдгүй шөвөг бий. 

Баримт 5

Түрүүлж хүчрэлгүй удсан тэрбээр өнгөрсөн оны 10 дугаар сард болсон барилдаанд анхны түрүүгээ хүртэж, дэмжигчдээ баярлуулсан юм. 

Баримт 6

Сумын заануудын барилдаанд хүч үзсэн цагаас түүний хамгийн ширүүн өрсөлдөгч нь одоогийн Цэргийн заан Ө.Батсуурь, Сумын заан С.Майнбаяр, Аймгийн арслан Э.Буянтогтох, Аймгийн заан С.Доржпалам нар байлаа. 

Баримт 7

Өнгөрсөн оны дөрөвдүгээр сард МҮОНРТ-ийн "Өв Түгээ" төсөл - Сумын заануудын халз барилдаанд тэр Улсын аварга С.Мөнхбатын багт сонгогдсон. Тэгэхдээ таван барилдаан хийж, нэг даваа авсан. 

Баримт 8

Тэрбээр Сумын заан цолтоы болон залуу бөхчүүдийн барилдаанд нийтдээ гурван удаа түрүүлж, зургаан удаа үзүүрлэсэн.

Баримт 9

Түүний хамгийн сайн хийдэг мэх тахимдах, хашиж мордох, үүрэх, өмсөх юм. 

Баримт 10

Тэр улс, аймгийн цолтнуудын барилдаанд дөрвөн удаан нэг давсан. Хамгийн сүүлд 2023 оны 11 дүгээр сарын 14-нд Их эзэн Чингис хааны мэндэлсний 861 жилийн ой, Монгол бахархлын өдөрт зориулсан барилдаанд Улсын заан Ц.Одбаяраар нэг давж, хоёр дээр гарди Ц.Бямба-Отгонд унажээ. Мөн өнгөрсөн оны Хэнтий аймгийн баяр наадамд гурав давсан. Түүнчлэн Багахангай дүүргийн баяр наадамд дөрөв давж, тав дээр үзүүр бөх, Тува улсын арслан, Аймгийн заан Монгуш Айдынд тахим өгсөн. 

Баримт 11

Одоо тэр дахиж Сумын заан байхгүй. Аймаг цэрэгт урамтай сайхан барилдаж түрүүлэхдээ өнөө цагийн хамгийн шилдэг Аймгийн арслангууд болох Э.Мөнхжаргал, Н.Өсөхбаяр, О.Наранбаатар нарыг дараалуулан хаясан юм. 

Л.Сайнаа