Өнгөрөгч амралтын өдрүүдэд дотоод, гадаадад спортын онцлууштай үйл явдлууд олон боллоо. Тэдгээрээс та бүхэнд тоймлон хүргэж байна.
Ахмад дайчин
NBA-ийн хамгийн нэр хүндтэй тоглогчдын нэг, "Хаан" хочит Леброн Жэймс өнгөрсөн бямба гарагт Голден Стэт Вариорсын эсрэг хийсэн тоглолтдоо 47 минутын турш талбайд тоглож, 36 оноо, 12 дамжуулалт өгч, 20 удаа самбараас бөмбөг авлаа. Энэ нь түүний замналын 139 дэх трипль дабль байлаа.
Лука түүх бичлээ
Хоёр өдрийн өмнө болсон тоглолтод Атланта Хавкинс Даллас Маверикс багууд тоглов. Уг тоглолтод Даллас Маверикс багийн хамгаалагч Лука Дончич 73 оноо авч, нэг тоглолтод авсан оноогоороо NBA-ийн түүхэнд дөрөвт бичигдэж эхэллээ. Ингэснээр тэр Уилт Чемберлен, Дэвид Томпсон нарын 73 оноотой зэрэгцэж буй. Одоо түүний дээр домогт Уилт Чемберлений 78, 100, Коби Брайантын 81 онооны амжилтууд бичигдэж байна.
Их аваргуудын залгамж үргэлжилсээр...
Мэргэжлийн сүмогийн Хацү башёд ёкозүна Тэрүнофүжи Г.Ган-Эрдэнэ 13 даваа, хоёр унаатайгаар түрүүлж, арлын Японд ес дэх ялалтаа авлаа. Тэрбээр өчигдөр озеки Киришима Б.Лхагвасүрэнг давснаар сэкиваке Котоновакатай нэмэлт барилдаан хийж, ялснаар Япон эзэн хааны цомыг гардан авлаа. Түрүү бөх Тэрүнофүжи өнгөрсөн арванхоёрдугаар сарын 28-нд Ерөнхийлөгчийн зарлигаар Монгол Улсын гавьяат тамирчин цол хүртсэн юм. Бусад монгол бөхчүүдийн тухайд, озеки Хошёорюү С.Бямбасүрэн, Киришима Б.Лхагвасүрэн, Тамаваши Б.Мөнх-Оргил даваатай башёг өндөрлүүллээ.
"Гран-При"-гийн хос хүрэл медаль
Олон улсын жүдо бөхийн холбооны 2024 оны анхны цуврал "Гран-При" тэмцээн Португал улсад зохион байгуулагдлаа. Энэ удаагийн тэмцээнд 90 орны эрэгтэй 344, эмэгтэй 280, нийт 624 жүдоч хүч үзлээ. Манай улсаас эрэгтэй 8, эмэгтэй 7 тамирчин оролцов. Тэмцээний эхний өдөр эмэгтэйчүүдийн -48кг жинд ОУХМ Г.Наранцэцэг хүрэл медалийн эзэн болсон.
Харин тэмцээний сүүлийн өдөр эрэгтэйтэйчүүдийн -100 кг жинд ОУХМ, аймгийн начин Б.Гончигсүрэн Япон улсын тамирчинг цэвэр ялж хүрэл медаль хүртэв.
Залуучуудын өвлийн олимп Ази тивд
Энэ удаагий залуучуудын өвлийн олимп Өмнөд Солонгос улсын Ганвон хотноо 10 дахь өдрөө үргэлжилж байна. Арван өдрийн дараах байдлаар Итали улс 10 алт, 2 мөнгө, 3 хүрэл медальтайгаар тэргүүлж буй. Удаах байрт Герман улс 7 алт, 3 мөнгө, 4 хүрэл, гуравдугаар байрт Франц улс 6 алт, 3 мөнгө, 4 хүрэл медальтай бичигдэж байна.
Л.Сайнаа
