Испанийн шигшээ багийн тоглогч, Дэлхийн хошой аварга, олимпийн хос мөнгөн медальт, Европын хошой аварга, NBA-ийн аварга, гурван удаагийн бүх оддын тоглогч, Шилдэг хамгаалан тоглогчийн шагналт Марк Гасол их спортоос зодог тайлж буйгаа мэдэгджээ.

2007 оны драфтын хоёрдугаар тойргийн 48 дахь сонголтоор Лос анжелес Лэйкерс багт элсэж байв. Тэрбээр 2003–2006 онд "FC Барселона", 2006–2008 онд "CB Girona", 2008-2019 онд "Мемфис Гриззлис", 2019-2020 онд "Торонто Рэпторс", 2020–2021 онд Лос Анжелес Лэйкерс багт тоглосон.

Одоогоор тэр 2014 онд өөрийн үүсгэн байгуулсан, Каталоны Жирона хотод төвтэй Испанийн мэргэжлийн сагсанбөмбөгийн багт тоглож буй. Уг баг нь АСВ лигт тоглодог. 

Түүний төрсөн ах нь мөн Испанийн шигшээ багийн тоглогч асан, NBA-ийн хоёр удаагийн аварга, зургаан удаагийн бүх оддын тоглогч, Дэлхийн аварга, Олимпын хошой мөнгө, нэг хүрэл медальт, Европын гурван удаагийн аварга, домогт тоглогч Пау Гасол билээ. 

Мемфис Гриззлис Марк Гасолийн гаргасан амжилтыг үнэлж, түүний 33 дугаарыг мөнхлөх юм байна. Түүний ах Газолын дугаарыг Лос Анжелес Лэйкерс баг өнгөрсөн онпд мөнхөлсөн юм. 

Л.Сайнаа