2023 оны Улсын баяр наадмын түрүү бөх М.Бадарчаас допинг илэрсэн гэж Спортын Арбитрын шүүх үзсэн. Допинг гэдэг бидний бахархал болсон үндэсний спортыг гутаадаг шавхай болоод удав. 

Өчигдөр л гэхэд хориотой бодис хэрэглэж, дөрвөн жилээр эрхээ хасуулсан Увс аймгийн арслан Б.Өсөхбаяр бөхийн өргөөнд хоёр давж, гурвын даваанд Хэнтий аймгийн арслан Д.Алтанцоожид өвдөг шороодов. Уг нь түүний эрх сэргээгүй байгаа. Гэвч эрх нь сэргэсэн гэж итгэсэн үү, яасан барилдаж явах зүгээр хэрэг үү?

Энэ талаар бид Допингийн эсрэг үндэсний төвөөс дэлгэрэнгүй мэдээлэл авсан юм. Тэд Улсын харцага Ц.Мөнхбаяр, Аймгийн арслан Б.Өсөхбаяр нарын барилдах эрх сэргээгүй тухай хэлэв. 

Допингийн 70-80 хувь нь эмийн бэлдмэл байдаг. Өсөхбаярын хэрэглэсэн гэх эм нь бүх цаг үеийн хориотой эм бодисын жагсаалтад зүй ёсоор багтдаг. Уг эмийн нэрийг предизин гэдэг бөгөөд зүрхний ишеми өвчний үед хэрэглэдэг ажээ. Хэрэв уг өвчин тухайн бөхөд илэрсэн бол барилдах нь битгий хэл гурван давхар шатаар алхахад хүндрэлтэй байдаг гэнэ. 

Уг эмийг эрүүл хүн уувал хүч, тамир нь огцом сэргэж улаан эс, зүрхний хүчил төрөгчийн хангамжийг 30-40 нэмдэг байна.

Ямар ч тамирчин эрүүл мэндийн шалтгаанаар эмийн бодис хэрэглэх шаардлага үүссэн тохиолдолд өргөдөл бичиж, холбогдох байгууллагаас зөвшөөрөл авах ёстой байдаг аж. Гэвч Б.Өсөхбаяр ямар ч зөвшөөрөл авалгүйгээр уг эмийг хэрэглэсэн байна. Энэ эмийг тамирчин огт хэрэглэж болохгүй. Бүх цаг үед хориглосон. Эмчилгээний зорилгоор ч уухыг хориглоно.

Ийм төрлийн зөрчилд тамирчид бүгд л эмчийн бичигтэй гэж хэлдэг ч дүрэм, журмын хүрээнд дагаж мөрдөх шаардлага тулгардаг байна. 

Дашрамд, уг бодис нь Улсын даян аварга Н.Батсууриас өмнө нь илэрч байжээ. Мөн ОХУ-ын алдарт уран гулгагч Камила Валеавагаас илэрсэн гэдэг. Мөн энэ нь хамгийн хүчтэй зүрхний эм гэлгээрээ алдартай аж. 

Харин М.Бадарч булчингийн масс нэмдэг хориотой эм уужээ. Харцага Ц.Мөнхбаярын хувьд Анаболик стеройд гэх гармонийн эм уусан байна. Увс нутгийн уг хоёр бөхөд гомдол ирсний дагуу шалгаж үзэхэд хориотой бодис илэрсэн байна. 

Ийм төрлийн зөрчил дээр дөрвөн жилээр эрхийг нь хасах шийтгэл оногдуулдаг авч Б.Өсөхбаяр арслан уг шийдвэрийг нь үл тоон өнөөдрийн барилдаанд хүртэл зодоглож байна. 

Л.Сайнаа