Ардын хувьсгалын 103 жилийн ой, Үндэсний их баяр наадам болоход сар хүрэхгүй хугацаа үлдэж, бөхчүүд наадмын бэлтгэлдээ гараад буй. Гэвч Улсын аварга С.Мөнхбат энэ жил зодоглохгүй гэдгээ мэдэгдэв. 

Аварга С.Мөнхбат “Би энэ жилийн наадмаар зодоглохгүй байя гэсэн бодолтой байгаа. Надад бэртэл, гэмтэл байхгүй. Өндөр түвшний бэлтгэл алга. 

Би барилдаад байвал барилдаад л байна. Гэхдээ Монгол Улсын аварга хүний үүрэг, оролцоо гэж бий. Тахим буулгаж, начин төрүүлээд, нутгийн дүү нарыг үнсээд байвал хэдэн жил ч үнсэж болохоор байна. Харин тэгэх шаардлага байна уу гэдэг нь асуудал. 

Хүн бүр өөр өөрөөр боддог байх. Миний хувийн бодол бол аварга хүн ард түмнээ баясгаад наадамдаа зодоглох нь сайхан. Гэхдээ яг үзүүр, түрүү булаалдах сэтгэл зүйгүй, ард түмэн тэгж харахгүй бол барилдаад хэрэггүй. Би гурван залуутай. Тэднийгээ бөх болгоно гэж бодож байгаа учраас аав нь унаж харагдаад байвал муухай биз дээ” гэсэн юм. 

Л.Сайнаа