Сүхбаатар аймгийн Онгон сумын түүхт 100 жилийн ойд зориулсан Монгол Улсын өсөх идэр харцага Дахын Одсүрэнгийн нэрэмжит улс, аймгийн алдар цолтой 128 бөхийн барилдаан 2025 оны 04 дүгээр сарын 06-ны ням гарагт 13:00 цагаас Монгол бөхийн өргөөнд болно. Тэгвэл бид та бүхэнд тус сумаас төрөн гарсан хүчит бөхчүүдийг танилцуулж байна. 

Улсын харцага Д.Одсүрэн

1934 оны нэгдүгээр сарын 01-нд Сүхбаатар аймгийн Онгон суманд мэндэлжээ. Дахын Одсүрэн нь 1968 оны Улсын баяр наадмаар тав давж Улсын начин цолыг хүртжээ. Улмаар 1972 онд зургаа давж цолоо баталсан амжилтыг нь нэхэн шагнаж 2004 онд түүнд Улсын харцага цол хүртээсэн байна. 

Улсын харцага Ш.Мөнгөнбаатар 

"Жавхлант" дэвжээ, "Алдар" спорт хороо, ЗХ-013 анги, Имарт ХХК-ийн бөх тэрбээр Аймгийн хурц арслан цолтойгоор олон жил сайн барилдсан нэгэн юм. Олны хайр хүндлэлийг хүлээсэн тэрбээр 2018 оны Улсын баяр наадмаар зургаа давж Улсын харцага цолонд хүрчээ. 2003 онд Аймгийн арслан болж, 2010 онд цолоо баталсан. 

Аймгийн хурц арслан О.Баярхүү 

Тэрбээр 1978 онд төрсөн. 2006 онд Аймгийн начин, 2007 онд Аймгийн заан, 2009 онд Аймгийн арслан цолонд хүрчээ. Улмаар 2011, 2019 онуудад цолоо баталжээ. 

Аймгийн хурц арслан Б.Номиндалай 

Тэрбээр 1993 онд төрсөн. 2010 онд Сумын заан, 2012 онд Аймгийн харцага, 2013 онд Аймгийн заан, 2014 онд Аймгийн арслан цолонд хүрч, 2016 онд цолоо баталжээ. 

Аймгийн хурц арслан Н.Өсөхбаяр 

Тэрбээр 1998 онд төрсөн. Улсын цолонд хамгийн ойрхон бөхийн нэг. 2017 онд Аймгийн харцага, 2018 онд Аймгийн арслан, 2022 онд цолоо баталсан. Бөхийн өргөөнд болсон улс, аймгийн олтны томоохон барилдаануудад олон удаа үзүүр, түрүүнд шалгараад байна. 

Л.Баяр