"PGL Astana 2025" тэмцээн Казахстан улсын нийслэл Астана хотод онцлох үйл явдлуудаар дүүрэн болж өрнөлөө. Хэсгийн шат тавдугаар сарын 14-нд дуусах үеэр 3-0-ийн үзүүлэлттэй "Team Spirit", "The MongolZ" багууд тэмцээнд түрүүлэх өндөр магадлалтай багуудаар нэрлэгдэж, "NAVI" ба "Aurora" багууд түрүүлэх боломжтой хэмээгдэж байв.
Харин "FURIA", "MIBR", "NIP", "Astralis" зэрэг багуудыг түрүүлнэ хэмээн мэргэжилтнүүд тэр бүр тооцоолоогүй.
Тавдугаар сарын 16-нд шөвгийн наймд "The MongolZ" болон "Aurorа" багууд хоорондоо тоглохоор оноолт таарч, "Aurora" баг 2:0 харьцаатай хөнгөхөн ялалт байгуулсан. Дараагийн тоглолтод олонх хүн "NAVI"-гийн илт давамгайлсан тоглолтыг хүлээсэн ч "Astralis" "Nuke" мап дээр 16-13-аар ялалт байгуулж, "Mirage" дээр 8-13-аар ялагдсан ч шийдвэрлэх "Ancient" мап дээр 13-6-гаар бут ниргэж, тэмцээний хамгийн том шуугианыг дэгдээв.
Үлдсэн хоёр тоглолтуудад "FURIA"-"MIBR"-ийг 16-13, 13-2-оор, "Team Spirit" — "NIP"-ыг 13-8, 13-11-ээр буулган авч хагас шигшээг бүрдүүлэв.
Хагас шигшээд азтай оноолт авсан мэт харагдсан "Aurora Astralis"-ийн эрч хүчтэй тоглолтын хэв маягийг дийлэлгүй 2:1 харьцаатай ялагдсанаар, Дани улсын багт "S-Tier" тэмцээний финалд удаан хугацааны дараа хүрсэн түүхэн боломжийг олгов. Нөгөө хагас шигшээд "Team Spirit", "FURIA"-г 7-13, 13-9, 13-7-гоор ялж, финалд шалгарав. Бразилчууд дараахи хүрэл медалийн тоглолтод ч ялагдал хүлээж, "Aurora" $150,000, "FURIA" $87,500-ын шагналын эзэд болсон.
Харин финалын тоглолт үзэгчдийн таамаглаж байсны дагуу болж өнгөрөв. "Team Spirit" эхний хоёр мап Dust2 (13-5), Nuke (13-10) дээр итгэл төгс ялалт байгуулаад, "Mirage" дээр 5-13-аар ялагдсан ч, "Train" мап дээр 16-13-аар ялж энэ улирлын хоёр дахь цомоо өргөлөө. Тэмцээний үнэ цэнэтэй тоглогчоор 86/58 K/D, 1.51 рейтингтэй Данил «donk» Крышковец нэрлэгдэж, HLTV × 1xBet-ийн MVP боллоо. Team Spirit $400,000, Astralis $170,000, Aurora $150,000, FURIA $87,500-ын шагнал тус тус хүртэв.
Ингээд PGL Astana 2025 хаалтаа хийлээ. Харин одоо IEM Dallas 2025 үргэлжилж, удалгүй BLAST.tv Austin Major 2025 эхлэх гэж байна. Монголын шилдэг баг The MongolZ хоёр тэмцээнд аль альд нь оролцож байгаа тул эх орныхоо баатруудыг дэмжиж, тэдний амжилтанд хамтдаа уухайлья.
