БНСУ-ын сагсан бөмбөгийн дээд лигийн тамирчин Х.Болдсүх "Сөүл Самсунг" багтай гурван жилийн гэрээ байгуулжээ. Тэрбээр 2020 онд БНСУ-ын сагсан бөмбөгийн дээд лиг болох “KBL”-ийн сонгон шалгаруулалтад драфтын наймаар “Чоньжү Эгис” багт орсон юм. Ийнхүү 2025 он хүртэл “Чоньжү Эгис” багт тоглохдоо лигийг 3 онооны шидэлтийн хувиараа тэргүүлж, 2023-2024 онд лигийн аварга болсон. 

Х.Болдсүх тус улсын лигт шалгаран тоглож буй хоёр дахь монгол тамирчин юм.

Тэрбээр 2009 онд 11 настайдаа Солонгост очсон бөгөөд Солонгосын иргэншилгүй учраас шигшээ багийн бүрэлдэхүүнд нь багтаж олон улсын тэмцээн, улсын аварга шалгаруулах тэмцээнд оролцох боломжгүй байсан аж. Улмаар 2018 онд их сургуулийн хоёрдугаар курст байхдаа БНСУ-ын иргэншилтэй болсон байдаг. Ийнхүү тэрбээр өнгөрсөн хоёрдугаар сард БНСУ-ын шигшээ багт дуудагдсан. Мөн “KBL” лигийн гурван онооны шидэлтийн аварга болж, өөрийн ур чадвараа гайхуулсаар буй. 

"Сөүл самсунг" багийн тухай

Сөүл Самсунг Тандерс баг 1978 онд байгуулагдсан БНСУ-ын Сагсанбөмбөгийн дээд лигт өрсөлддөг. Анх Samsung Electronics-ийн ивээн тэтгэлэгээр үүсгэн байгуулагдаж байжээ. Тэд “KBL” лигийн хоёр удаагийн аварга баг юм.