Олон улсын хэмжээний мастер, жүдоч Болдын Ганхайч нь 1995 оны хоёрдугаар сарын 22-нд төрсөн, энэ жил 30 нас хүрч буй. Тэрбээр жүдо бөхөөр үндэсний шигшээ баг, "Алдар" спорт хорооны харьяалагддаг.
Унгар улсын Будапешт хотноо болж буй ДАШТ-ний 63 кг-ын жинд Үндэсний шигшээ багийн тамирчин Б.Ганхайч хагас шигшээд олимп, дэлхийн аварга Бразилын бөх Рафаэла Сильваг вазари үнэлгээгээр ялж хүрэл медаль хүртлээ.
Ийнхүү Монголын жүдо бөхийн ДАШТ-ий 33 дахь медаль, 20 дахь хүрэл медальтан Б.Ганхайч болов.
Тэрбээр энэ оны олон улсын тэмцээний хоёр дахь медалиа хүртэж буй бөгөөд өнгөрсөн сард "Душанбе-2025" Их дуулгаас алтан медаль хүртсэн юм.
Монгол Улсын баг хоёр хүрэл медальтайгаар одоогийн байдлаар 93 орноос 11 дүгээр байрт жагсаж байна.
Түүний амжилтаас дурдвал,
Азийн аварга шалгаруулах тэмцээнээс
- 2017 оны Ази тивийн аварга шалгаруулах тэмцээний хүрэл медаль
- 2019 оны Ази, Номхон далайн бүсийн аварга шалгаруулах тэмцээний мөнгөн медаль
- 2022 оны Ази тивийн аварга шалгаруулах тэмцээний алтан медаль
Олон улсын жүдо бөхийн холбоо “Их дуулга”
- 2018 оны Дюссельдорфын Их дуулга тэмцээний хүрэл медаль
- 2019 оны Екатринбургийн Их дуулга тэмцээний хүрэл медаль
- 2020 оны Дюссельдорфын Их дуулга тэмцээний хүрэл медаль
- 2021 оны Бакугийн Их дуулга тэмцээний мөнгөн медаль
- 2024 оны Парисын Их Дуулга тэмцээний хүрэл медаль
Олон улсын жүдо бөхийн холбоо “Гран при”
- 2016 оны Улаанбаатар гран при тэмцээний мөнгөн медаль
- 2018 оны Хөххотын Гран при тэмцээний хүрэл медаль
- 2022 оны Загребийн Гран при тэмцээний хүрэл медаль
Д.Батчулуун
