Буурал түүхтэй Унгар улс нийслэл Будапешт хотдоо гурав дахь удаагаа жүдо бөхийн дэлхийн аварга шалгаруулах тэмцээнийг хүлээн аваад байна. Өнөөдөр тэмцээний зургаа дахь өдөр. Одоогоор манай жүдочид хоёр хүрэл медаль хүртээд буй. Тодруулбал, эрэгтэйчүүдийн -60 кг-ын жинд К.Ёолк, эмэгтэйчүүдийн -63 кг-ын жинд Б.Ганхайч нар ДАШТ-ий анхны медалиа хүртэн, олон жилийн хөдөлмөр зүтгэлээ үнэлүүлээд байгаа юм. Тэгвэл бид та бүхэнд Монголчууд Унгарын ДАШТ-д өмнө хэрхэн оролцож байсан тухай баримтыг хүргэж байна. 

2017 оны Будапештын ДАШТ-ээс манай жүдочид алт, мөнгө, дөрвөн хүрэл медаль хүртэн бахдам сайхан наадсан билээ. Тэмцээний эмэгтэйчүүдийн -57 кг-ын жинд Д.Сумъяа алтан медаль, эмэгтэй -48 кг-ын жинд М.Уранцэцэг мөнгөн медаль, эмэгтэй 63 кг-ын жинд Б.Мөнгөнчимэг хүрэл медаль, эрэгтэй -60 кг-ын жинд Г.Болдбаатар хүрэл медаль, эрэгтэй -73 кг-ын жинд Г.Одбаяр хүрэл медаль, эрэгтэй +100 кг-ын жинд Н.Түвшинбаяр хүрэл медаль тус тус хүртэж байв. 

Хэрэв та бүхэн санаж байгаа бол Олимпын алт, мөнгөн медальт Найдангийн Түвшинбаяр аварга уг тэмцээнд жин өгсөж барилдаад хүрэл медаль хүртэхэд нь нэрт тайлбарлагч С.Шижирбат "бахдам" тайлбараа хийж, үзэгч олныг уйлуулж байсан нь саяхан мэт. 

2021 оны Будапештын ДАШТ-ээс манайхаас эрэгтэй -66 кг-ын жинд Ё.Басхүү хүрэл медаль хүртэж, эмэгтэй -48 кг-ын жинд М.Уранцэцэг мөн л хүрэл медаль хүртэж байлаа. Замналаа өндөрлүүлж яваа гавьяат М.Уранцэцэг эл тэмцээнээс медаль хүртсэн нь мөн л Монголын ард түмнийг бахдуулах, уйлуулах зэрэгцүүлж байсан билээ. 

Харин өнөө жил эрэгтэй -60 кг-ын жинд ирээдүй байгаа харуулж К.Ёолк хүү дэлхийн медальтан болов. Эмэгтэй 63 кг-ын жинд Б.Ганхайч олон жилийн нөр их хөдөлмөрөө үнэлүүлж хүрэл медаль хүртэв. Монголчууд дахин дахин бахдав. 

Дашрамд, манай улс жүдогийн зургаан ДЭЛХИЙН АВАРГА-тай байдгийн нэг нь Унгар болсон ДАШТ-ээс төрөн гарчээ. Ээлтэй энэ нутаг Монголчууудад дахин дахин хишгээ хайрлах болтугай. 

Л.Баяр