24tsag.mn сайтын зүгээс уншигч та бүхэнд Тулгар төрийн 2234, Их Монгол Улсын 819, Үндэсний эрх чөлөө, тусгаар тогтнолоо сэргээн мандуулсны 114, Ардын хувьсгалын 104 жилийн ой, Үндэсний их баяр наадмыг угтан "Наадам айсуй" цуврал нийтлэлийг хүргэж байна. Энэ цувралаар Үндэсний сурын харваачдын гайхам амжилтуудаас хуваалцаж байгаа юм. 

72 насандаа Спортын мастер цол хүртсэн

Улсын хүндэт мэргэн харваач Я.Дашдэндэв

Баян-Өлгий аймгийн Алтанцөгц сумын уугуул спортын мастер Ярангаа овогтой Дашдэндэв бээр сур харваагаар хичээллээд 35 жил болж байгаа аж. 2015 онд Ховд аймагт зохион байгуулсан Баруун бүсийн чуулга харваанд 72 насандаа монгол улсын спортын мастер цолны болзол хангасан байдаг. Хичээллэж эхэлсэн цагаасаа хойш нэг ч удаа улсын наадмыг өнжиж байсан удаагүй. Тэрбээр халх, урианхай, буриад харваа зэргээр харавдаг.

Тэрбээр харваач ахмадуудаас хамгийн сүүлд буюу 2022 онд спортын мастер цол хүртсэн. 

2020 оны зургаадугаар сарын 26-ны өдрийн тэргүүлэгчдийн хурлаар Алдар спорт хорооноос ирсэн тодорхойлолтыг үндэслэн тэргүүлэгчдийн 100 хувийн саналаар дэмжиж, үндэсний сурын Хүндэт мэргэн цолыг 2020 оны долоодугаар сарын 11 өдөр олгосон байна.

Я.Дашдэндэв "Нэг сум тавьсны ард нь яавал илүү сайжрах бол гэж бодогдуулдаг тул хүний сонирхлыг байнга татаж, хөгжүүлж байдгаараа энэ спорт онцлог. Тэр бүрд эв дүй сайжрах, тунгаан бодох, төлөвлөх ухаан хөгждөг" хэмээн хэвлэлд өгсөн ярилцлагадаа дурдсан байна.

Түүнийг 1992 онд эл спортоор хичээллэж эхлэхэд 400 орчим харваач л байжээ. Тэрбээр нас, хүйс үл харгалздаг, үндэсний спортоороо бахархдаг аж.