МҮБХ-ны “Алтан түнш" байгууллага Өмнөговь аймгийн нэрэмжит Монгол улсын Их хурлын гишүүн, Эдийн засгийн Байнгийн хорооны дарга Р.Сэддоржийн санаачилгаар зохион байгуулагдсан Ахмад бөхчүүдийн барилдааны 55-аас дээш насны ангилалд 32 бөх барилдсанаас Увс аймгийн Тэс сумын харьяат, “Алдартан” дэвжээний бөх, улсын заан Дамирангийн Бумбаяр түрүүлж, Архангай аймгийн Эрдэнэмандал сумын харьяат, “Алдар” спорт хороо, “Бөхбилэгт” дэвжээний бөх, аймгийн арслан Чойжилын Эрдэнэчулуун үзүүрлэв.
Дунд буюу 50-54 насны ангилалд 40 бөх барилдсанаас Өвөрхангай аймгийн Есөнзүйл сумын харьяат, “Хилчин” спорт хороо, “Ноён Сүлд” ХХК-ий бөх, улсын өсөх идэр начин Мижиддоржын Жамъянпүрэв түрүүүлж, Дорнод аймгийн Цагаан-Овоо сумын харьяат, “Хүч” спорт хороо, “Дорнод нутаг” дэвжээний бөх, улсын начин Дондогийн Цогзолдорж үзүүрлэв.
Харин 45-49 насны ангилалд хамгийн олон буюу 48 бөх барилдсанаас Булган аймгийн Бүрэгхангай сумын харьяат, Хилчин спорт хороо, Булганхан дэвжээний бөх, улсын заан Дашзэвэгийн Баасандорж түрүүлж, Завхан аймгийн Тосонцэнгэл сумын харьяат, Хүч спорт хороо, Завхан Даян дэвжээний бөх, улсын харцага Шүхэрийн Уламбаяр үзүүрлэв. Тэгвэл бид та бүхэнд түрүү бөхчүүдийн тухай баримтуудыг хүргэж байна.
Улсын заан Д.Бумбаяр
Дамирангийн Бумбаяр 1968 оны наймдугаар сарын 24-нд нь Увс аймгийн Тэс суманд төржээ. Үндэсний бөхийн улсын заан цолтой хүчтэн юм. Тэрбээр 1992 онд Аймгийн заан цол хүртэж, дараа жил нь буюу 1993 оны Улсын баяр наадмаар 5 давж Улсын начин цол хүртсэн. Эл амжилтаа тэр 1994, 1998 онд бататгажээ.
Улмаар 2001 онд 33 насандаа 7 давж Улсын заан цолыг хүртсэн юм. Тэрбээр мөн 2002 онд 6, 2006 онд 5 давсан байдаг. Түүний эд үед алдарт "Зургаан залуу заан" хамгийн хүчтэй өрсөлдөгч нь байв.
Ташрамд сонирхуулахад, Улсын манлай заан Б.Пүрэвсайхан түүний хүргэн билээ.
Улсын өсөх идэр начин М.Жамъянпүрэв
Мижиддоржийн Жамъянпүрэв нь Өвөрхангай аймгийн Есөнзүйл сумын харьяат. Үндэсний бөхийн улсын өсөх идэр начин цолтой бөх. Тэрбээр 1972 оны тавдугаар сарын 10-нд мэндэлсэн.
1993 онд 21 насандаа Өвөрхангай аймгийн баяр наадамд аймгийн заан Х.Болдоор долоо даван түрүүлж "Аймгийн арслан" цол хүртсэн. 1995 онд 23 насандаа АХ-ын 74 жилийн ойн баяр наадамд тухайн үеийн улсын начин одоогийн Дархан аварга А.Сүхбатаар дөрөв, улсын заан Д.Эрдэнэбатаар тав давж "Монгол улсын начин" цолыг хүртсэн.
Мөн л "Зургаан залуу заан"-д халгаатай явсан, уран барилдаанд бөх тэрбээр 2002 онпд АХ-ын 81 жилийн ойн баяр наадамд тухайн үеийн Улсын начин одоогийн Улсын заан Б.Сайнбаяраар дөрөв, тухайн үеийн Аймгийн арслан одоогийн Улсын харцага Д.Батболдоор тав даван шөвгөрч начин цолоо батлан "Өсөх идэр" чимэг нэмжээ. Бөхийн өргөөнд хоёр түрүүлж, хоёр үзүүрлэсэн.
Улсын заан Д.Баасандорж
Дашзэвэгийн Баасандорж нь 1979 оны тавдугаар сарын 30-нд Булган аймгийн Бүрэгхангай суманд төрсөн. Үндэсний бөхийн Улсын заан юм.
Тэрбээр 2001 онд Аймгийн начин, 2003 онд Аймгийн заан цолонд хүрсэн. Улмаар 2005 оны улсын наадамд 5 давж Улсын начин цол, 2007 онд Улсын наадамд 6 давж Улсын харцага цол хүртсэн. 2010 онд 5 давж чимэг нэмсэн бол 2011 онд 32 насандаа Улсын наадамд 7 давж Улсын заан цол тус тус хүртжээ.
Тэрбээр Бөхийн өргөөнд гурав түрүүлж, тав үзүүрлэсэн амжилттай.
Л.Баяр
