Голомт банк нь хөрөнгө оруулагчидтай харилцах үйл ажиллагаанд ихээхэн ач холбогдол өгч, олон улсын хөрөнгө оруулагчдад Монгол Улсын эдийн засаг болон банкны салбарын талаарх мэдээллийг тогтмол, үр дүнтэй хүргэх үйл ажиллагааг байнга зохион байгуулж, хэрэгжүүлдэг билээ.
Тухайлбал бид 2025 оны дөрөвдүгээр сард Capital Markets Mongolia (CMM)-ийн Нью-Йорк хотод зохион байгуулсан “Mongolia Investment Forum: New York 2025” арга хэмжээнд ерөнхий ивээн тэтгэгчээр ажиллаж, АНУ-ын хөрөнгө оруулагчдад Монгол Улсын эдийн засгийн төлөв байдал, банк санхүүгийн салбарын онцлог, хөрөнгө оруулалтын боломжуудын талаар мэдээлсэн юм.
Харин энэ удаад бид Лондонгийн Хөрөнгийн Биржид зохион байгуулагдсан “Mongolia Investment Forum: London 2025” арга хэмжээнд мөн ерөнхий ивээн тэтгэгчээр оролцож, хамтран ажилласан бөгөөд Монгол Улсын Шадар сайд Т.Доржханд, Монгол Улсад суугаа Их Британийн Элчин сайд Фиона Блайт, ИБУИНХУ-д суугаа Элчин сайд Б.Энхсүх, Лондонгийн Хөрөнгийн Биржийн Гүйцэтгэх захирлын орлогч Чарли Уокер, Монголын Хөрөнгийн Бирж, Америкийн BNY Mellon банк болон Их Британийн A&O Shearman компанийн хүндэт төлөөллүүд болон Голомт банкны Гүйцэтгэх захирал А.Одонбаатар нар оролцлоо.
Арга хэмжээний үеэр, Лондонгийн Хөрөнгийн Биржийн Гүйцэтгэх захирлын орлогч Чарли Уокер уг форумын үйл ажиллагааг нээж, хоёр орны хамтын ажиллагаанд өндөр ач холбогдолтой арга хэмжээ болж буйг цохон тэмдэглэв. Түүнчлэн форумын үндсэн илтгэлээр Монгол Улсын Шадар сайд Т.Доржханд Монголын эрчим хүчний реформ, боломжуудыг танилцуулсан юм.
Мөн Лондонгийн Хөрөнгийн Биржийн анхдагч зах зээл, Европын бүс нутгийг хариуцсан захирал Аюуна Ничаева модератороор ажиллаж, Голомт банкны Гүйцэтгэх Захирал А.Одонбаатар, BNY Mellon банкны Европ, Дундад Ази болон Африк бүсийн Зах Зээлийн Стратегич Жеофф Ю болон A&O Shearman компанийн Партнер Жеймс Рое нар “Монгол улсаас Их Британи руу: Хөрөнгө оруулалтын шинэ боломж” сэдвээр Монголын банкны салбарт хөрөнгө оруулах чиглэлээр хэлэлцүүлэг өрнүүллээ. Түүнчлэн Голомт банкны олон улсын хөрөнгийн зах зээл дэх амжилттай оролцоо болон бизнесийн өсөлтийн талаарх хөрөнгө оруулагчдын танилцуулгыг банкны Хөрөнгө оруулагчидтай харилцах хэлтсээс Э.Батхорлоо танилцуулсан юм.
“Mongolia Investment Forum: London 2025” нь Лондонгийн Хөрөнгийн Биржийн 120 хүний багтаамжтай танхимд зохион байгуулагдсан ба нийт 130 оролцогч бүрэн ирцтэйгээр оролцсон бөгөөд олон улсын тавцанд Монголын хөрөнгө оруулалтын орчныг таниулах, гадаадын хөрөнгө оруулагчдын итгэлийг нэмэгдүүлэхэд чухал хувь нэмэр оруулсан үйл явдал боллоо.
Голомт банк цаашид ч хөрөнгө оруулагчидтай харилцах харилцаагаа улам бэхжүүлж, Монгол Улсын эдийн засаг, санхүүгийн салбарын талаарх мэдээллийг олон улсын хөрөнгө оруулагчдад тогтмол, үр дүнтэйгээр хүргэх чиглэлд идэвхтэй ажиллах болно.
Дэлхийн жишиг Монголын банк
