Теннисний домог, 23 удаагийн “Их дуулга”-ын аварга Серена Уильямс мэргэжлийн талбайдаа эргэн ирэхээ албан ёсоор баталлаа. Тэрбээр ирэх долоо хоногт Английн Лондон хотод болох HSBC Championships (Queen’s Club) тэмцээний хосын төрөлд оролцохоор болсон байна. Энэ нь түүний 2022 оны АНУ-ын нээлттэй тэмцээнээс хойших анхны албан ёсны өрсөлдөөнт тоглолт болох юм.

44 настай Серена сүүлд 2022 оны US Open тэмцээнд тоглосон бөгөөд тухайн үедээ “теннисээс холдож байгаа” хэмээн хэлж байсан ч албан ёсны зодог тайлсан мэдэгдэл хэзээ ч гаргаагүй. Түүний эргэн ирэх тухай таамаглал өнгөрсөн жилээс хүчтэй яригдаж эхэлсэн бөгөөд Серена допингийн хяналтын албан ёсны хөтөлбөрт дахин хамрагдсан нь эргэн ирэлт хийх дохио байв.

Queen’s Club тэмцээний зохион байгуулагчид Серенагийн оролцоог олон нийтийн сүлжээгээр баталгаажуулсан байна. Тэрбээр Канадын 19 настай залуу тоглогч Виктория Мбоко-той хослон тоглох төлөвтэй байгаа аж.

Серена Уильямс карьерынхаа туршид 23 “Их дуулга”-ын ганцаарчилсан түрүү хүртэж, эмэгтэй теннисний нээлттэй эрин дэх хамгийн амжилттай тамирчдын нэг болсон. Түүний эргэн ирэлт зөвхөн Queen’s Club-оор хязгаарлагдах уу, эсвэл удахгүй болох Уимблдон тэмцээнд оролцох уу гэдэг нь теннисний ертөнцийн гол анхааралд ороод байна.

Одоогоор Серена цаашид ганцаарчилсан төрөлд тоглох эсэхээ зарлаагүй ч түүний эргэн ирэлт эмэгтэй теннисний хамгийн онцлох үйл явдлуудын нэг гарцаагзүй мөн билээ. 

Л.Баяр