Украины Ерөнхийлөгч Владимир Зеленский тус улсын Зэвсэгт хүчний ерөнхий командлагч, генерал Олександр Сирскийг албан тушаалаас нь чөлөөлж, оронд нь хошууч генерал Михайло Драпатийг томиллоо. Энэ нь Оросын түрэмгийллийн дайн эхэлснээс хойших Украины армийн дээд удирдлагын хамгийн том өөрчлөлтүүдийн нэг болж байна.
43 настай Драпати нь Украины армид шинэ үеийн командлагчдын төлөөлөлд тооцогддог бөгөөд фронт дахь туршлага, шинэ технологийг цэргийн ажиллагаанд ашиглахыг дэмждэгээрээ нэр хүндтэй юм. Тэрээр өмнө нь Украины Хуурай замын цэргийн командлагчаар ажиллаж байсан бөгөөд Оросын цэргүүдийн эсрэг олон чухал ажиллагаанд оролцжээ.
Харин 60 настай Сирский 2024 оны хоёрдугаар сараас Украины Зэвсэгт хүчний ерөнхий командлагчаар ажилласан. Тэрээр Киевийг Оросын довтолгооноос хамгаалах ажиллагаа болон Украины армийн Курскийн ажиллагаанд гол үүрэг гүйцэтгэсэн ч цэргийн удирдлагын хатуу арга барил, их хэмжээний хохирол амссан ажиллагаануудтай холбоотойгоор шүүмжлэлд өртөж байв. Сирскийг огцруулах шийдвэр нь Украины улс төр, цэргийн хүрээнд хэд хэдэн өөрчлөлт гарсны дараа хийгдсэн юм. Тухайлбал, Ерөнхийлөгч Зеленский өмнө нь Батлан хамгаалахын сайд Михайло Федоровыг албан тушаалаас нь чөлөөлсөн нь олон нийтийн эсэргүүцэлтэй тулгарсан байна.
Федоровыг Украины армийн дроны технологи, цэргийн шинэчлэлийг эрчимжүүлсэн гол хүмүүсийн нэг гэж үздэг. Түүнийг огцруулсны дараа Украины олон хотод эсэргүүцлийн жагсаал өрнөж, армийн шинэчлэлийг үргэлжлүүлэхийг шаардсан байна. Үүний дараа Зеленский армийн дээд удирдлагад дахин өөрчлөлт хийж, Сирскийг чөлөөлөн Драпатийг ерөнхий командлагчаар томилжээ.
Шинэ командлагч Драпати нь 2014 оноос хойш Оросын эсрэг байлдаж ирсэн туршлагатай офицер юм. Түүнийг Мариуполь болон Донбассын бүс дэх ажиллагаанд гаргасан шийдэмгий үйлдлүүдээр нь олон нийт, цэргийн алба хаагчид сайн мэддэг. Тэрээр мөн цэргийн сургалт, элсэлт, командлалын тогтолцоог шинэчлэх шаардлагатай гэж үздэг шинэ үеийн офицеруудын нэг юм. Зеленский Сирскийг албан тушаалаас нь чөлөөлөхдөө түүний дайны үеийн гавьяаг онцлон тэмдэглэсэн ч Украины армид шинэчлэл, шинэ чиглэл шаардлагатай болсон гэж мэдэгджээ.
Шинэ командлагч Драпати болон Зеленский нар Украины арми Оросын эсрэг алсын тусгалын дрон болон өндөр нарийвчлалтай цохилтын ажиллагаагаа үргэлжлүүлнэ гэдгийг мэдэгдсэн байна. Энэхүү өөрчлөлт нь зөвхөн нэг генералыг нөгөөгөөр солих явдал биш бөгөөд Украины армийн удирдлагыг шинэчлэх, технологид суурилсан дайны арга барилыг эрчимжүүлэх, олон нийтийн итгэлийг сэргээх зорилготой томоохон өөрчлөлт гэж ажиглагчид үзэж байна.
Л.Баяр
