Жеффри Эпштейнтэй холбоотой залуу эмэгтэйчүүдийг танилцуулж байсан Францын загварын агент Даниэль Сиад Парисын ойролцоох гэртээ нас барсан байна. 69 настай Сиадын цогцсыг даваа гаргийн орой Францын нийслэлийн захын Коломб хот дахь гэрээс нь олжээ. Нантерын шүүхийн прокурорын орлогч Мари-Селин Лавриш CNN-д мэдээлснээр, түүний үхлийн шалтгааныг тогтоохоор задлан шинжилгээ хийхээр болсон байна.

Сиад нь 10 гаруй жилийн турш бэлгийн хүчирхийлэл, хүний наймааны хэргээр ял шийтгүүлж байсан Жеффри Эпштейнтэй хамтран ажиллаж, түүнд олон загвар өмсөгч эмэгтэйг танилцуулж, худалдаж байсан гэх мэдээлэл гарсан. Түүний нэр 2026 онд нийтэд ил болсон Эпштейнтэй холбоотой баримтуудад ойролцоогоор 2000 удаа дурдагдсан байна.

Францын эрх баригчид Сиадын үйл ажиллагаатай холбоотой бэлгийн хүчирхийлэл, хүний наймааны хэргийг шалгаж байжээ. Таван эмэгтэй түүнийг хүчингийн хэрэг болон хүний наймаатай холбоотой гэж буруутгасан ч түүнийг баривчлах хангалттай нотлох баримт одоогоор бүрдээгүй байсан байна. Сиад өөрт нь тавьсан бүх буруутгалыг няцааж, Эпштейнтэй харилцсан харилцаа нь зөвхөн мэргэжлийн шинжтэй байсан гэж мэдэгдэж байжээ.

Түүний өмгөөлөгч Сиад зүрхний шигдээсээр нас барсан байж болзошгүй гэж үзэж байгаа ч албан ёсны шалтгааныг задлан шинжилгээний дараа тогтооно. Сиадын нэр Эпштейний баримтуудад олон зуун удаа дурдагдсан нь түүнийг залуу эмэгтэйчүүдийг Эпштейнтэй холбож өгдөг байсан гэх хардлагыг дахин олны анхаарлын төвд оруулсан юм. Зарим баримтад тэрээр залуу эмэгтэйчүүдийн зураг, танилцуулгыг Эпштейнд илгээж, тэднийг уулзуулах ажлыг зохион байгуулж байсан талаар дурдагддаг байна.

Сиад нас барсан ч Францын эрх баригчдын эхлүүлсэн мөрдөн шалгах ажиллагаа үргэлжилнэ. Мөрдөн шалгах багийн 10 орчим ажилтан хэргийг үргэлжлүүлэн шалгаж байгаа аж.

Энэ нь Францад Эпштейнтэй холбоотой байсан загварын салбарын хоёр дахь хүний үхэл болж байна. Өмнө нь Эпштейнтэй ойр харилцаатай байсан загварын агент Жан-Люк Брюнель 2022 онд шүүхийн өмнө хоригдож байхдаа нас барсан юм. Тэрээр мөн насанд хүрээгүй охидын хүчирхийлэл, хүний наймаатай холбоотой хэрэгт буруутгагдаж байжээ.

Л.Баяр