Италийн өмнөд хэсэгт орших Калабрия мужид ой, хээрийн түймэр гаргахын тулд муурыг ашигласан байж болзошгүй хэрэг гарч, эрх баригчид мөрдөн шалгалт эхлүүлжээ. Түймрийн гарал үүслийг шалгаж байх үеэр мөрдөгчид шатамхай бодис түрхсэн байж болзошгүй муурыг олсон байна. Калабрия мужийн Иргэний хамгаалалтын газрын дарга Доменико Костарелла энэ хэргийг санаатай галдан шатаалт гэж үзэж байгаагаа мэдэгджээ.

Тэрбээр “Галыг тараахын тулд эдгээр амьтдыг ашигласан байх” хэмээн ярьсан байна. Мөн ой дотроос шатамхай бодис шингээсэн даавуун материалын завсар байрлуулсан лаа болон гал асаах төхөөрөмжүүд олджээ.

Гэхдээ Италийн өмнөд хэсэгт амьтныг ашиглан гал тавьсан гэх хэрэг анх удаа гарч байгаа нь энэ биш аж. 2016 онд Сицилийн эрх баригчид мафийн бүлэглэлүүд үндэсний цэцэрлэгт хүрээлэнгүүдэд түймэр тавихдаа муур ашигласан байж болзошгүй гэж мэдэгдэж байв. Үүнээс нэг жилийн дараа Неаполийн ойролцоох Везувий галт уулын орчимд мөн ижил төстэй арга хэрэглэсэн гэх мэдээлэл гарч байжээ.

Өнгөрсөн онд CNN мэдээлэхдээ, мафийн бүлэглэлүүд заримдаа газар нутгийг галдан шатаасныхаа дараа хямд үнээр худалдан авах зорилгоор түймэр тавьдаг байж болзошгүйг дурдсан байна.

Италийн Sky TG24 телевизийн мэдээлснээр, Амьтан болон байгаль орчныг хамгаалах холбоо энэ хэрэгтэй холбоотойгоор гомдол гаргажээ. Мөн муурыг ашиглан гал тавьсан этгээдийн талаар мэдээлэл өгсөн хүнд 1,000 еврогийн шагнал олгохоор болсон байна.

Л.Баяр