Марвелийн алдарт супер баатар Spider-Man-ийн шинэ анги болох “Spider-Man: Brand New Day” кино дэлхийн кино зах зээлд хүчтэй нээлт хийж, эхний амралтын өдрүүдээрээ асар их орлого олжээ. Тус кино дэлхий даяар нийт 927 сая ам.долларын орлого олж, кино урлагийн түүхэн дэх хамгийн өндөр орлоготой нээлтүүдийн хоёрдугаарт бичигдсэн байна.

Кино Хойд Америкийн зах зээлд эхний амралтын өдрөөрөө 355 сая ам.доллар цуглуулсан нь 2019 онд гарсан “Avengers: Endgame” киноны 357 сая ам.долларын рекорд амжилтын дараах хамгийн өндөр үзүүлэлт болжээ.

Энэ удаагийн кинонд жүжигчин Том Холланд Питер Паркер буюу Spider-Man-ийн дүрийг дахин бүтээсэн бөгөөд энэ нь түүний тус дүрд тоглосон дөрөв дэх бие даасан кино болж байна. Мөн Зендая MJ-ийн дүрээр эргэн иржээ. Киноны үйл явдал өмнөх түүхийн дараах Питер Паркерын амьдрал, хүмүүс түүнийг Spider-Man гэдгийг мартсан ертөнцөд ганцаардал, шинэ эхлэлтэй тэмцэж буйг харуулдаг байна.

Шинжээчдийн үзэж буйгаар энэхүү амжилт нь сүүлийн жилүүдэд буурч байсан супер баатрын киноны нэр хүнд дахин сэргэж байгааг харуулж байна. Кино үзэгчдийн үнэлгээ өндөр байсан бөгөөд шүүмжлэгчдийн үнэлгээ 90 хувь, үзэгчдийн үнэлгээ 98 хувьд хүрсэн талаар мэдээлжээ.

Ялангуяа Хятадын зах зээлд кино маш амжилттай нээлт хийж, ойролцоогоор 121 сая ам.долларын орлого олсон байна. Энэ нь тус киноны дэлхийн хэмжээнд амжилт гаргахад чухал нөлөө үзүүлжээ. “Spider-Man: Brand New Day” кино нь Sony болон Marvel-ийн хамтын бүтээл бөгөөд Spider-Man-ийн франчайзыг дэлхийн нийт орлогоороо 10 тэрбум ам.долларын босгод ойртуулж байгаа томоохон бүтээл болж байна.

Кино сонирхогчдын хувьд энэ амжилт нь зөвхөн нэг бүтээлийн ялалт бус, Холливудын супер баатрын төрөл дахин хүчээ авч буйн дохио болж байна. Дэлхийн кино зах зээлд сүүлийн үед томоохон бүтээлүүд амжилттай гарч эхэлсэн бөгөөд “Spider-Man: Brand New Day” энэ оны хамгийн анхаарал татсан кинонуудын нэгээр нэрлэгдэж байна.

Л.Баяр