Ким Ё Жон АНУ-ын Ерөнхийлөгч Дональд Трамп болон Ким Жон Ун нарын хооронд дахин уулзалт, яриа хэлэлцээ хийх боломжтой талаар өөрт нь ямар нэгэн мэдээлэл ирээгүй гэж мэдэгджээ. Трамп сүүлийн үед Ким Жон Унтай харилцаагаа эерэгээр үнэлж, цаашид түүнтэй дахин уулзах хүсэлтэй байгаагаа илэрхийлсэн. Тэрбээр Кимийг “найз” хэмээн нэрлэж, хоёр орны хооронд яриа хэлэлцээ хийх боломж байгааг удаа дараа онцолж байна.

Гэвч Кимийн бага дүү Ким Ё Жон үүнийг өөр байр сууринаас харж байгаа бололтой. Тэрбээр АНУ-тай хийх аливаа хэлэлцээний талаар өөрт нь мэдээлэл ирээгүйг хэлж, Вашингтон, Пхеньяны хооронд ойрын хугацаанд бодитой дипломат ахиц гарах эсэхэд эргэлзээ төрүүлэв.

Энэ нь Трампын засаг захиргаа Өмнөд Солонгостой хийх хамтарсан цэргийн сургуулилалтыг багасгасантай зэрэгцэн гарч буй мэдэгдэл юм. Трамп уг шийдвэрээ Ким Жон Унтай харилцаагаа хурцатгахгүй байх сонирхолтойгоо холбон тайлбарласан. АНУ, Өмнөд Солонгосын хамтарсан цэргийн сургуулилалтыг тал хувиар бууруулсан нь Өмнөд Солонгосын эрх баригчдыг төдийгүй АНУ-ын засаг захиргаан дахь зарим хүмүүсийг ч гайхшруулсан гэж CNN мэдээлжээ.

Гэсэн хэдий ч Вашингтоны энэхүү алхам Пхеньяны байр суурийг одоогоор өөрчилсөн шинж тэмдэг ажиглагдаагүй байна. Трампын хувьд Ким Жон Унтай харилцаагаа сэргээж, цөмийн зэвсгийн асуудлаар дахин хэлэлцээ хийх сонирхол байгаа ч Хойд Солонгос цөмийн хөтөлбөрөөсөө татгалзах байр сууриа өөрчлөх эсэх нь тодорхойгүй хэвээр байна.

Трамп Ким Жон Унтай дахин уулзах боломжийг ярьж байгаа боловч Пхеньян талаас одоогоор үүнийг дэмжсэн тодорхой дохио гараагүй бөгөөд Ким Ё Жон хүртэл ийм яриа хэлэлцээний талаар мэдээлэлгүй гэдгээ мэдэгдсэн байна.

Л.Баяр