Норвегийн хаан Харальд V 89 насандаа таалал төгсөж, 35 жил үргэлжилсэн хаанчлал нь өндөрлөлөө. Тэрээр наймдугаар сарын 28-ны өглөө Осло хотын Үндэсний эмнэлэгт 06:35 цагт нас барсан гэж Хааны ордон мэдээлжээ. 1937 онд төрсөн Харальд V нь 1991 онд эцэг Олав V-ийг залгамжилж, Норвегийн хаан ширээнд суусан юм. Тэрээр Европын хамгийн өндөр настай хаан байсан бөгөөд 35 жилийн турш тус улсыг төлөөлөн ажиллахдаа ард иргэдийнхээ дунд өндөр нэр хүндтэй байжээ.

Хаан Харальд сүүлийн жилүүдэд эрүүл мэндийн хэд хэдэн асуудалтай тулгарч байсан бөгөөд энэ сарын дундуур эмнэлэгт хэвтэн эмчлүүлж байжээ. Түүний биеийн байдал хүндэрсний дараа гэр бүлийнхэн нь эмнэлэгт цугласан бөгөөд наймдугаар сарын 28-нд нас барсан байна.

Харальд V Норвегийн хаант засгийг орчин үеийн хэлбэрт ойртуулахад чухал үүрэг гүйцэтгэсэн. Тэрээр жирийн иргэн Соня Харольдсентэй гэрлэсэн нь тухайн үедээ хаант гэр бүлийн уламжлалт хэв маягаас нэлээд өөр алхам байсан бөгөөд хосууд 1968 онд гэрлэжээ.

Мөн 2011 оны Норвегийн аймшигт террорист халдлагын дараа ард түмэндээ хандан эв нэгдэл, хүлээцтэй байдлыг уриалсан нь түүний хаанчлалын онцлох мөчүүдийн нэг болсон юм. Түүнийг Норвегийн ард түмэн “улс үндэстнийг нэгтгэгч” төрийн тэргүүн хэмээн үнэлдэг байжээ.

Хаан Харальдын нас барснаар Норвегийн хаан ширээ түүний 53 настай хүү Хаакон Мангуст автоматаар шилжиж, тэрээр Хаакон VIII нэрээр шинэ хаан болов. Норвегид хэд хэдэн өдрийн үндэсний гашуудал зарлах бөгөөд хаан Харальдыг Ослогийн сүмд хүндэтгэлтэйгээр үдэхээр төлөвлөж байна. Осло хотод олон мянган иргэн хааны ордны өмнө цэцэг, лаа өргөн, эмгэнэл илэрхийлж байна. Европын хаад, төрийн тэргүүнүүд ч Харальд V-ийг таалал төгссөнд эмгэнэл илэрхийлжээ.

Л.Баяр