АНУ-ын Ерөнхийлөгч Дональд Трамп Израилын Баруун эрэг дэх еврей суурьшлуудтай холбоотой Их Британи тэргүүтэй орнуудын авч буй хориг арга хэмжээний талаар байр сууриа илэрхийлжээ. Их Британи Баруун эрэг дэх Израилын суурьшлуудаас бараа бүтээгдэхүүн импортлохыг хориглох, суурьшлын үйл ажиллагааг дэмжиж буй компани болон хувь хүмүүст хориг тавих, Израилын эзлэн түрэмгийллийн бодлогыг дэмжихэд ашиглагдаж болзошгүй зарим төрлийн экспортын зөвшөөрлийг цуцлах зэрэг арга хэмжээ авахаа зарласан байна. Франц, Канад мөн уг арга хэмжээг дэмжжээ.

Трамп Их Британийн Ерөнхий сайдтай хийсэн утасны ярианыхаа үеэр уг хоригийг хэрэгжүүлэх төлөвлөгөөний талаар урьдчилан мэдээлэл авсан боловч арга хэмжээг хойшлуулахыг шаардсангүй гэж барууны нэгэн албан тушаалтан мэдээлсэн байна.

АНУ-ын Төрийн нарийн бичгийн дарга Марко Рубио ч Вашингтон Их Британийг дагаж ижил хориг тавихгүй гэдгийг хэлсэн ч Лондоны шийдвэрийг шууд шүүмжлээгүй байна. Тэрээр Баруун эрэгт хүчирхийлэл, хурцадмал байдал нэмэгдэхээс зайлсхийх нь чухал гэж онцолжээ.

Харин АНУ-аас Израилд суугаа Элчин сайд Майк Хакаби Их Британийн хоригт хариу арга хэмжээ авна гэж мэдэгдсэн боловч түүний мэдэгдэл Цагаан ордон болон Төрийн департаменттай зохицуулагдаагүй байсан гэж АНУ-ын албан тушаалтан тайлбарласан байна.

Үүний зэрэгцээ Израил Их Британийн шийдвэрийн хариуд Зүүн Иерусалим дахь Британийн консулын газрыг хаах шийдвэр гаргаж, дипломат ажилтнуудыг тус бүсээс гарахыг шаарджээ.

Л.Баяр