Барилгын компаниудын метр квадрат дутсан асуудал олны анхаарлын төвд байсаар байна. Бүх барилгын компаниуд иргэдэд нийт 2.8 тэрбум төгрөгний хохирол учруулсан гэж ШӨХТГ-аас мэдэгдсэн. Үүнээс зөвхөн 300 сая төгрөгийн хохирлыг л барагдуулаад байгаа юм. Тухайлбал, "Тайгам Алтай" компани 300 сая, "Тектоник" компани 400 сая, "Ти Си Ди" компани 600 сая төгрөгөөр иргэдийг хохироосон ч өдгөө нөхөн төлбөрийг олгохгүй байсаар байгаа билээ. Иргэд банк, барилгын компанитай гэрээ байгуулж аль хэдийнэ зээлээ төлж эхлээд байрандаа орчихсон байдаг. Гэтэл эдгээр компани иргэдтэй байгуулсан гэрээгээ зөрчиж, тэдэнд мэдэгдэлгүй орон сууцных нь талбайгаас хумсалж, мөнгө залилсан байгаа нь иргэдийг бухимдуулж байгаа юм.Тэгвэл чамгүй олон хүн хохироож, багагүй метр квадратын зөрүү гаргасан гэх "Алтай" хотхоныг барьсан "Тайгам Алтай", баруун дөрвөн замын "Гранд плаза"-гийн хажууд Г хэлбэрийн орон сууц барьсан "Ти Си Ди", "Хансвилл" хотхоныг барьсан "Тектоник" компаниуд цагдаагийн байгууллагад шалгагдаж байгаа аж.
"Тайгам Алтай" компани ер нь олны ундуйцлыг их л хүргэж байсан. Тухайлбал, тус компанийн дэд захирал асан Ц.Сономцэрэн зургаан жилийн өмнө хоёр оюутныг машинаараа дайрч хөнөөж олныг цочирдуулж байжээ. Ц.Сономцэрэн "Тайгам Алтай" компанийн гүйцэтгэх захирал Ц.Даваасүрэнгийн төрсөн ах гэдэг.
Ийн "Тайгам Алтай"-д дургүйцсэн иргэд тэдний өмнөх хэргүүдийг сөхөж эхэллээ.
Д.Дуулим
Сэтгэгдэл (2)