Хөгжлийн банкны захирал Н.Мөнхбат болон Эдийн засгийн хөгжлийн яамны удирдах албан тушаалтнуудыг АТГ-аас шалгаж эхэлсэн. Энэ талаар АТГ-ын Мөрдөн шалгах хэлтсийн дарга Э.Амарбатаас тодруулахад дараах хариултыг өгсөн юм.

"Эдгээр албан тушаалтнууд Халзан бүргэдээс Солонготын даваа чиглэлийн 100 км авто замын гүйцэтгэл нь нийт 38 орчим хувьтай байхад, уг газарт шинээр зам тавих гэж байна хэмээн засгийн газарт ойлгуулж дахин тогтоол батлуулсан. Улмаар нэмж  46,3 тэрбум төгрөгийг “Монроуд” компанид шууд шилжүүлсэн байгаа юм.

Хоёрдугаарт Зам-Үүд хилийн боомтын ачааны шалган нэвтрүүлэх цогцолборт 8,7 км хатуу хучилттай замын ажил гүйцэтгэхээр өмнө нь техник эдийн засгийн үнэлгээ хийгдэж байсан юм байна. 20 тэрбум төгрөгөөр ажлыг гүйцэтгэх боломжтой байна гэсэн үнэлгээ гарсан байхад түрүүчийн Халзан бүргэдээс Солонготын даваа чиглэлийн замын асуудлыг шийдсэн Засгийн газрын хуралдаанаар энэ асуудлыг давхар оруулж, нөгөө 20 тэрбумын ТЭЗҮ-тэй замын ажлыг 33 тэрбум хэмээн хөрөнгийг нь батлуулж, Хятадын хөрөнгө оруулалттай аж ахуй нэгжид санхүүжилтийг нь олгосон байгаа. Энэ бүхэн нь хууль тогтоомжид бүрэн гүйцэд нийцэхгүй, сэжиг бүхий байгаа учир эрүүгийн хэрэг үүсгээд шалгаж байна" гэв.

Түүнчлэн энэ хэрэгт Эдийн засгийн хөгжлийн яамны сайд Н.Батбаярыг сэжигтнээр татсан гэх мэдээллийг няцаасан юм.