УИХ-ын дэд дарга Р.Гончигдорж "Үндэсний их баяр наадмын тухай хууль"-д нэмэлт өөрчлөлт оруулах асуудлыг санаачилан батлуулсан. Уг хуулийн дагуу далай аварга цолыг хассан юм. Тэгснээр даян аварга А.Сүхбат, Г.Өсөхбаяр хоёр дархан аварга цол хүртэх нь тодорхой болсон.
    Ард түмний нэг хэсэг хуулиар цол олгож, хасч болохгүй гэж байгаа бол нөгөө хэсэг нь дархан аварга ойрын хугацаанд төрөх боломжгүй байна. Уламжлалаа дагаад өмнө байгаагүй далай аварга цолыг хасах нь зөв гэж байр сууриа илэрхийлцгээж эхлэсэн.
    Мөн үндэсний бөхийн үе үеийн аваргууд ч УИХ-ын энэ шийдвэрийг дэмжиж байгаа юм. Тухайлбал Дархан аварга Ж.Мөнхбат, Х.Баянмөнх, Д.Цэрэнтогтох, Б.Бат-Эрдэнэ, аварга О.Балжинням, Д.Сумъяабазар, С.Мөнхбат, Г.Эрхэмбаяр нар дэмжиж байгаагаа илэрхийлсэн юм. Мөн Г.Өсөхбаяр, А.Сүхбат хоёр ч гэсэн төрийнхөө шийдвэрт сэтгэл хангалуун байгаагаа өмнө ярисан. Хамгийн сүүлд даян аварга А.Сүхбат “Хараахан дархан аварга цолоо авчихаагүй байна. Гэхдээ би сүүлийн жилүүдэд бэлтгэл, сургуулилтаа хаяагүй болохоор барилдахад бэлэн. Яагаад бэлтгэл, сургуулилт сайн байдаг вэ гэхээр олон шавьтайгийн маань ач. Тэд нартайгаа барилдах, биетээр мэх, техникийг үзүүлэх, хамтарсан бэлтгэл, сургуулилт хийх зэргээр байнга барилдаж л байгаа. Баяр наадмаас өмнө дархан аварга цол хүртвэл ард түмнээ хүндэтгээд төрийнхөө их наадамд барилдана" гэж мэдэгдлээ.
    Эх сурвалжийн мэдээлж байгаагаар бол Г.Өсөхбаяр, А.Сүхбат хоёрт наадмын нээлтийн үеэр дархан аварга цолыг нь нөхөж өгөхөөр бэлтгэж байгаа гэнэ. Тэгвэл Г.Өсөхбаяр, А.Сүхбат хоёр дархан аварга цолтойгоо төрийн наадмын баруун, зүүн жигүүрийг манлайлан барилдахаар төлөвлөн ярилцаж бэлтгэлээ хийж байгааг эх сурвалж онцоллоо. Тиймээс энэ жилийн наадмын нэг сонин нь хоёр шинэ дархан аварга цолоо авч, баруун, зүүний жигүүрээс манлайлан барилдсан тухай байх аж.