21-р зуунд олон монголчуудын амь насыг авч одсон өвчин бол элэгний хорт хавдар. Одоо ч Монгол улс элэгний В, С вирусын өвчлөлөөр дэлхийд нэгдүгээрт бичигдэж байна. Тодруулбал 10 монгол хүний нэг нь энэ өвчнөөр өвдсөн гэсэн үг. Гэтэл энэ өвчнийг 90 хувь анагаах эм гарчихаад байхад монголчууд элэгний хавдраар амиа алдсаар байна. Мөнгө бэлтэй нэг нь гадаад руу эмчлүүлэхээр явж байхад, ядуу нэг нь бөө, удганы үүд сахиж байгаа дүр зураг олон.

  Сүүлийн жилүүдэд элэгний өвчлөлтэй тэмцэхээр дэлхийн эрдэмтэд олон эм туршиснаас хамгийн амжилттай нь “Gilead Sciences” компанийн Софосбувир /Sovaldi/ эм юм. АНУ-д энэ эмийг 3-5 жил туршиж хэрэглэж байхад Монголын Эрүүл мэндийн яам харин хэрэглэхээс татгалзсаар байна. “Gilead Sciences” компани энэ эмийг дэлхийн 20 оронд 44 дахин хямд үнээр зарж байгаа бөгөөд үүнд Монгол улс багтжээ. Уг эмийн нэг сарын эмчилгээ нь 300 доллар, гурван сарын эмчилгээ нь 900 доллар, зургаан сарын эмчилгээ нь 1800 доллар байх юм.  Гэтэл ЭМЯ, тодруулбал Н.Удвал сайд "шинэ эмийг заавал гурван жил туршсны дараа хэрэглэх ёстой" гэсэн журам яриад уг эмийг Монголд оруулж ирэхээ татгалзаж байна. Эмүүл мэндийн дэд сайд Ж.Амарсанаа харин эсрэг байр суурьтай байгаа бөгөөд элэгний өвчлөлийг маш богино хугацаанд эдгээх энэ эмийг аль болох түргэн хугацаанд монголчуудад хүргэх ёстой гэж мэдэгдлээ. Нэгэнт америкчууд 3-5 жил туршаад хэрэглэж эхлээд байхад манай ЭМЯ "бид дахиж туршина" гээд гэдийж байна. ЭМЯ-ны дэд сайд Ж.Амарсанаа энэ эмийн талаар Ерөнхийлөгч, ерөнхий сайдад танилцуулсан бөгөөд бүгд энэ эмийг хямдралтай үнээр оруулж ирж, элэгний өвчтэй хүмүүсийн амь насыг аврах ёстой гэсэн байр суурийг дэмжжээ. Гэтэл ЭМЯ-нд ганцхан Ж.Амарсанаа энэ асуудлыг хөөцөлдөж, ганцаардаж байна.

   Шинэ эм хэрэглэнэ гэдэг өвчнөө эдгээх гэж буй хүмүүсийн хувьд эмзэг асуудал. Гэхдээ энэ эмийг дэлхий нийтээрээ туршаад хэрэглэж эхэлсэн байхад манай яам журам яриад олон хүний амь аврах асуудлыг хойшлуулаад байгаад олон нийт гайхаж байна. Хууль биш, сайдын гарын үсгээр өөрчилж болох энэ журамд "шаардлагатай үед шууд хэрэглэж болох" тухай заалт оруулбал олон хүний амийг аварч болохоор. ЭМЯ энэ асуудлаас болоод дотроо хагаралтай байна. Монголд найз нөхөд, хамаатан садны хэн нэг нь элэгний B, C вирусээр өвдсөн тухай сонсоогүй нэг ч хүн байхгүй. Ийм гамшгийн хэмжээнд тулчихаад байхад ганц журам өөрчлөхгүй байгаа Н.Удвал сайдад өөр эрх ашиг байна уу гэж хардах хүн олон байна.