С.Зоригийн амийг хөнөөсөн Ц.Амгаланбаатар нарт холбогдох эрүүгийн хэргийн Хяналтын шатны шүүх хурал өнөөдөр Улсын Дээд Шүүхэд болох байсан боловч өмгөөлөгчийн хүсэлтээр хойшилсон талаар бид мэдээлсэн билээ.
Тэгвэл Дээд шүүх шүүх хурлыг хойшлуулах шийдвэр гаргасны дараа ялтан Т.Чимгээ болон Б.Содномдаржаа нарын ар гэрийнхэнээс шүүх хурлын дараа Т.Чимгээ болон Б.Содномдаржаа нартай уулзсан эсэхийг тодрууллаа.
С.Бямбасүрэн: Т.Чимгээ “Намайг эндээс аваач, юун төлөө энд хоригдож байгаа билээ” гэж хэлээд л уйлдаг
Энэ талаар Т.Чимгээгийн нөхөр С.Бямбасүрэн “Манай өмгөөлөгч жилд нэг удаа гадаад руу эмчилгээнд явдаг. Нэгдүгээр сард явах байсан ч шүүх хурлаас болоод эмчилгээнд явж чадаагүй. Тиймээс тавдугаар сард эмчилгээндээ явж, шүүх хурлыг хойшлуулах хүсэлт гаргасан. Би тавдугаар сарын 12-нд эхнэртэйгээ уулзсан. Эхнэр минь уулзах болгондоо уйлж гарч ирдэг. Юм ярьж чадахгүй “Намайг эндээс аваач, юун төлөө энд хоригдож байгаа билээ” гэж хэлээд л уйлдаг. Үнэхээр үнэн ялдаг л юм бол Дээд шүүхийн арван хүний тав нь хуулиндаа үнэнч яваасай гэж хүсэж байна” гэв.
Л.Жавзмаа: Дээд шүүхийн хурлыг хаалттай явуулбал өмнөх хурлын шийдвэрийн дагуу болох байх гэж эмзэглэж байна
Харин Б.Содномдаржаагийн ээж Л.Жавзмаа “Энэ хэргийн талаар найман настай хүүхдээс наян настай өвгөд эмгэд хүртэл мэдэж байгаа. Энэ хурлыг нээлттэй олон түмнийхээ нүдэн дээр хийлгэх хэрэгтэй. Үүнд Дээд Шүүх л бидэнд туслах хэрэгтэй. Хаалттай явуулбал өмнөх хурлын шийдвэрийн дагуу болох байх гэж эмзэглэж байна. Шүүх хурлыг нээлттэй явуулах саналыг бид олон удаа өгсөн. Хүүтэйгээ хүнд дэглэмт хорих ангид орсноос нь хойш уулзаагүй байгаа. Сэтгэл санаа нь ямар байгааг мэдэхгүй байна” гэсэн юм.
Б.Энхжин
Сэтгэгдэл (17)