УИХ-ын зарим гишүүн бойкот зарласан нь хууль зүйн үндэстэй эсэх талаар УИХ-ын Тамгын газрын Ерөнхий нарийн бичгийн дарга Ц.Цолмонгоос тодрууллаа.

-Чуулганы хуралдаанд суухгүй, ирцээр бойкот зарлаад байгаа хууль эрхзүйн хувьд ийм эрхтэй юү.  Ард түмний төлөөлөл болно гэж УИХ-д сонгогдсон гишүүд парламентын үйл ажиллагааг тасалдуулаад байх нь ёсзүйн хувьд байж болох асуудал уу?

-Уг нь миний бодлоор бойкотлоно гэдэг цөөнхийн л хийх ёстой ажил. Хэрхэн бойкотлодог вэ гэхээр, хэлэлцэж байгаа асуудлаас завсарлага  авах, хурал хаяж гарах зэргээр л хийдэг л дээ.

-УИХ-ын даргыг огцруулах дөрвөн гишүүний цуглуулсан гарын үсгийн тоо УИХ-ын олонхи буюу 39-д хүрсэн байна.  Үүгээр УИХ-ын даргыг огцруулах хууль зүйн үндэс байгаа юу?

-Байхгүй гэдгийг УИХ-ын даргын зөвлөх хэвлэл мэдээллийн хэрэгслэлээр хангалттай ярьсан байна лээ. 75 гишүүн бүгдээрээ огцор гэж гарын үсэг зураад ч , чуулганы зааланд орж  кнопдоод ч УИХ-ын даргыг огцруулах хууль зүйн үндэс байхгүй.  УИХ-ын дарга өөрөө хүсэлтээрээ л  ажлаа өгвөл юу юм гэхээс. Спикер гэдэг албан тушаал ганцхан Монголд байдаг юм биш. Аль XIII  зуунд Англид анх парламент үүсэхэд л энэ албан тушаал бий болсон, хүн төрөлхтөний  түүхтэй хамт бараг 800 жил болж байгаа л албан тушаал. Үүнийг улс төрийн өнцгөөс харахаасаа гадна Үндсэн хууль судлаачид, хуульчдын санал бодлыг сонсох нь зүйтэй. Мөн шаардлагатай бол Үндсэн хуулийн цэц үнэлгээ дүгнэлт өгөх байх.

-Парламентын засаглалтай улс орнуудад ийм зүйл болж байсан жишээ бий юү?

-Англид ч, Америкт ч парламентын спикерийг кнопдож, хүчээр огцруулсан тохиолдол миний харж, уншснаар лав байгаагүй  юм билээ.

-Та өнөөдрийн энэ үйл явцыг юу гэж дүгнэж байна вэ?

-Яахав, өнөөдрийн улстөр бол цаг хугацааны л асуудал шүү дээ. Монголын төр үүрд биз дээ. Дараа нь дахиад л сонгууль болно, өөр бүрэлдэхүүнтэй УИХ бүрдэнэ. Тэрний дараа дахиад л бас өөр гишүүдээс бүрдсэн УИХ үйл ажиллагаа явуулна. Энэ асуудал зөвхөн  одоогийн УИХ-ын даргыг огцруулах төдий асуудал биш. Жишиг тогтох гээд байна. Шахсаар байгаад УИХ-ын даргыг огцруулдаг юм гэхэд ингээд  УИХ-ын даргыг огцруулж болох жишиг тогтох байх даа.

Нөгөө талаасаа энэ чинь улс төрийн л процесс өрнөж байгаа хэрэг. Ямар ч улс төр явлаа гэхэд хүчин төгөлдөр үйлчилж байгаа хуулийн хүрээнд л шийдвэр гарах ёстой гэж бодож байна.

Х.Хулан