Сэлэнгэ аймгийн төвөөс 10 хүрэхгүй км-ийн зайтай Монгол, Оросын хил дээр байгалийн үзэсгэлэн бүрдсэн Сайханы хөтөлийг аялал жуулчлалын цогцолбор болгон хөгжүүлэх саналыг Сэлэнгэ аймгийн Засаг дарга гаргажээ. “Сайханы хөтөл” аялал жуулчлалын цогцолборыг 2019-2020 онуудыг дамнан гүйцэтгэгдэх бөгөөд шилэн гүүр, морин аялал, явган аялал, жижиг автобусны аялал, брэнд бүтээгдэхүүний худалдаа, бичил банкны үйлчилгээ, бэлэг дурсгалын үзэсгэлэн, кофе шоп, авто зогсоол гэсэн хэсэгтэй байх юм байна. Цогцолбор байгуулах ажлын хүрээнд эхний ээлжинд Сүхбаатар сумаас “Сайханы хөтөл” хүртэл 10 км хатуу хучилттай зам тавигдах юм байна.

Мөн хил хамгаалах зориулалттай нэг км зам, хил хамгаалах постын байрууд хийгдэх аж. Өнгөрсөн 2017 оны байдлаар Сэлэнгэ аймгийн Алтанбулаг дахь Олон улсын боомтоор нийт 1.7 сая орчим тээврийн хэрэгсэл, 7.2 сая орчим зорчигч дамжин өнгөрчээ. Тус цогцолборын аялагч татах хамгийн гол үзмэр нь Сайханы хөтөл дэх хадыг ашиглан барих 70 м-ийн урттай шилэн гүүр байх аж. Тус аялал жуулчлалын цогцолборын байгууламж нь дөрвөн тэрбум төгрөгийн өртгөөр босох тооцоо гарчээ.