Үндэсний их баяр наадам, Ардын хувьсгалын 99 жилийн ойн баяр наадамд улсын заан Б.Батмөнхөөр тав давж улсын начин цол хүртсэн Доржхандын Хүдэрбулга нь 1992 оны тавдугаар сарын 7-д Төв аймгийн Өндөрширээт суманд төрж, 2010 онд нийслэлийн Баянгол дүүргийн 73 дугаар дунд сургууль төгссөн.
Өдгөө МУБИС-ийн Биеийн тамирийн дээд сургуульд багш дасгалжуулагч мэргэжлээр суралцаж байна. 2003 онд дасгалжуулагч Ж.Дандар, Ц.Лхаажав нарын удирдлага чөлөөт бөхийн спортоор анхлан суралцаж, 2010 оноос эхлэн “Ганьт”, "Алдартан”, “Гачуурт-Олимп”, “Дүнжингарав” зэрэг клуб, “Сүлд” спорт хороонд бэлтгэл сургуулилтаа хийж байв. 2009 оны Үндэсний бөхийн өсвөр үеийнхний УАШТ-ээс мөнгө, 2012 оны залуучуудын УАШТ-ээс алтан медаль хүртэж, 2014 онд аймгийн арслан, 2020 онд улсын начин цол хүртжээ. Түүнчлэн чөлөөт бөхийн Залуучуудын УАШТ-ээс алт, Бүх ард түмний спортын наадмаас алт, хүрэл, УАШТ-ээс гурван алт, хошой хүрэл медаль хүртсэн шилдэг бөх юм. 2011 онд спортын мастер, 2012 онд олон улсын хэмжээний мастер цол хүртсэн.
2014 онд Узбекистаны улсын Ташкент хотод болсон чөлөөт бөхийн ДАШТ-нд ҮIII байр эзэлж, 2014, 2015 онд АНУ-ын Лос-Анжелес хотод болсон Дэлхийн цомын төлөөх эрэгтэй багийн тэмцээнд эх орноо төлөөлөн тив дэлхийн шилдгүүдтэй хүч үзсэн хүчтэн. 2013 онд ОХУ-ын Казань хотод болсон Оюутны зуны универсиад наадмаас хүрэл, 2015 онд БНСУ-ын Мунгён хотод болсон Армийн дэлхийн зуны спортын наадмаас мөнгө, 2014 онд БНСУ-ын Инчён хотод болсон Азийн спортын наадмаас хүрэл медаль хүртэхээс гадна 2012 онд БНСУ-ын Гуми, 2013 онд Энэтхэг улсын Нью-Дели, 2016 онд Тайланд улсын Бангкок хотод болсон Азийн АШТ-ээс хүрэл медаль хүртсэн түүхтэй. Түүний их спортын талбарт үзүүлсэн хамгийн өндөр амжилт бол 2014 оны Казахстан улсын Астана хотод болсон Азийн аварга шалгаруулах тэмцээнээс алтан медаль хүртсэн амжилтыг энд онцлохгүй байх аргагүй.
Мөн эх орны дэвжээнд болдог "Mongolia Open” олон улсын тэмцээнээс 2014-2016 онд алт, 2013, 2019 онд хүрэл, ОХУ-ын Буриад улсын Улаан-Үд хотод болсон Б.Будаевийн нэрэмжит залуучуудын олон тэмцээнээс 2010, 2013 онд хүрэл, Якутск улсад болсон ОХУ-ын Гавьяат дасгалжуулагч Гусеевийн нэрэмжит залуучуудын тэмцээнээс 2011 онд мөнгө, 2012 онд ОХУ-ын Красноярск хотын аварга шалгаруулах тэмцээнээс алт, Казахстан улсын Астана хотод болсон чөлөөт бөхийн олимпийн сонгон шалгаруулах тэмцээнээс хүрэл, ОХУ-ын Буриад улсын “Ерөнхийлөгчийн Цом”-ын төлөө тэмцээнээс 2013, 2015 онд хүрэл, ОХУ-ын Буриад улсад болсон “Baikal Open” олон улсын тэмцээнээс 2019 онд мөнгө, ОХУ-ын Тува улсын Кызыл хотод болсон Төв Азийн аварга шалгаруулах тэмцээнээс алт, Азербайжан улсын Баку хотод болсон “Голден Гран-При” тэмцээнээс хүрэл, 2015 онд Казахстан улсын улсын төр, нийгмийн нэрт зүтгэлтэн Д.Кунаевийн дурсгалд зориулсан олон улсын тэмцээнээс хүрэл, “Казахстан улсын Ерөнхийлөгчийн цомын төлөө” тэмцээнээс багийн мөнгө, 2016 онд Турк улсад болсон Яшар Догугийн нэрэмжит олон улсын тэмцээнээс мөнгө, Казахстан улсын Астана хотод болсон “Рио-де-Жанейро-2016” олимпийн сонгон шалгаруулах тэмцээнээс хүрэл, Улаанбаатар хотод болсон сонгон шалгаруулах тэмцээнээс хүрэл, Турк улсын Стамбул хотод болсон сонгон шалгаруулах тэмцээнээс мөнгө, 2016 онд Испани улсад болдог уламжлалт “Gran Premio de España" олон улсын тэмцээнээс мөнгөн медаль хүртсэн. алдарт бөх билээ.
Б.Жаргал
