Тулгар төрийн 2229, Их Монгол Улсын 814, Ардын хувьсгалын 99 жилийн ой, Үндэсний их баяр наадамд тав давсан хамгийн залуу начин цолтонд Монголын Залуучуудын Холбооноос 27 дахь жилдээ хурдан удмын даага гардуулдаг уламжлалтай. Даага хөтөлсөн бөхчүүдийн 10 нь цолоо ахиулсан байна.

Өнөө жилийн хурдан удмын даагыг Архангай аймгийн Хайрхан сумын харьяат, “Алдар” спорт хороо, “Бөх билэгт” дэвжээний бөх Оюунбаатарын Мөнх-Эрдэнэ хөтөлсөн билээ. Мордох, хутгах, шахаж татах мэхээ даацтай хийж олон хүчтэнийг сөхрүүлж ирсэн О.Мөнх-Эрдэнэ нь 2016 оны Архангай аймгийн баяр наадамд тав давж аймгийн начин, 2017 онд цолоо баталж, 2019 онд цэргийн начин болж, тэр жилээ Орхон аймгийн баяр наадамд найм даван түрүүлж аймгийн арслан цол хүртэж байв. Түүнээс хойш их бага гэж гололгүй барилдаан бүрт зодоглож, том цолтнуудын ёстой л аранга болсон. О.Мөнх-Эрдэний улсын цолонд хүрэхээс өмнө үзүүлсэн оргил амжилт гэвэл өнгөрсөн жил Чингэлтэй хайрханы тахилга наадамд түрүүлсэн. Тэр мөчөөс эхлэн бөх сонирхогчид түүнийг улсын цол хүртэх бөх, цаашлаад өндөр даваанд гарч барилдах хүү хэмээн ам булаалдан ярих болсон. Өнөө жил Улсын баяр наадамд хоёр дахь удаагаа гарч барилдаж буй тэрээр гурван жилийн өмнө Улсын баяр наадмын нэгийн даваанд улсын начин С.Батсуурьтай үнэн хүчийг үзэн давсан. Удаах даваанд улсын харцага Л.Пүрэвжав, улсын заан Ц.Баярсайхан нарыг унагаж, нутгийн аварга Г.Өсөхбаярт тахим өгсөн. Эцэг талаасаа даншигийн начин Бадрах, эх талаасаа улсын начин Д.Жадамбаагийн удмын бөх.

Энэ жилийн наадмаар одтой, зоригтой, золбоотой барилдаж нэгийн даваанд залуу бөх Б.Зоригоо, хоёрын даваанд аймгийн арслан Д.Цэвэлсодном, гурвын даваанд дархан аварга Г.Өсөхбаяр, дөрвийн даваанд харцага Н.Батзаяа, тавын даваанд аварга С.Мөнхбатыг давж улсын начин цол хүртэж, зургаагийн даваанд баяр наадмын түрүү бөх П.Бүрэнтөгст унасан билээ.