Мэргэжлийн боксын WBC, WBA, IBF холбоод  энэ сарын 18-нд шинэчилсэн чансаагаа танилцуулжээ.

Чансаа танилцуулах үеэр “WBC” холбооны хөнгөн жингийн чансааг Монгол Улсын гавьяат тамирчин, Олимпийн мөнгөн медальт Нямбаярын Төгсцогт тэргүүлж эхэлснийг зарласан байна.

28 настай Н.Төгсцогтын хувьд одоогийн байдлаар мэргэжлийн бокст 12 тулаан хийж, 11-т ялсан. Тэрбээр өнгөрсөн хоёрдугаар сарын 09-нд Гари Рассель Жрт  ялагдсан билээ.

Н.Төгсцогт ирэх сарын 19-нд Мексикийн боксчин Эдуардо Рамирезтай тулалдахаар товлогдсон. Эдуардо Рамирез одоогийн байдлаар 28 тулаан хийснээс 23 ялж, хоёр ялагдаж, гурав тэнцсэн үзүүлэлтээр IV байрт бичигдээд байна.